اسپین ٹرین حادثہ، ہلاکتوں کی تعداد ۳۹ہوئی

میڈرڈ، 19 جنوری//
سپین کے سول گارڈ کا کہنا ہے کہ جنوبی سپین کے قصبے آدموز کے نزدیک دو ٹرینوں میں تصادم کے نتیجے میں کم از کم 39 افراد ہلاک ہو گئے ہیں۔
ریل نیٹ ورک آپریٹر عدیف کے مطابق یہ واقعہ قرطبہ شہر کے نزدیک واقع آدموز قصبے کے قریب اس وقت پیش آیا جب ملاگا سے میڈرڈ جانے والی ایک تیز رفتار ٹرین کی بوگیاں پٹری سے اتر کر دوسری پٹری پر چڑھ گئی جو مخالف سمت سے آنے والی ایک ٹرین سے ٹکرا گئی۔
ریلوے حکام کے مطابق حادثے کے وقت دونوں ٹرینوں میں عملہ سمیت 400 افراد سوار تھے۔
ایمرجنسی سروسز کے مطابق، اس تصادم کے بعد 122 افراد کو طبی امداد دی گئی جن میں سے 48 اب بھی ہسپتال میں زیرِ علاج ہیں۔
زخمیوں میں سے ایک بچے سمیت 12 افراد انتہائی نگہداشت کے وارڈ میں داخل ہیں۔
اس سے قبل سپین کے وزیر ٹرانسپورٹ آسکر پوینٹے نے اسے ’انتہائی عجیب‘ واقعہ قرار دیتے ہوئے کہا کہ ٹرین جہاں پٹری سے اتری ہے وہاں کا ٹریک وہ بالکل سیدھا ہے جس کی پچھلے سال مئی میں مرمت کی گئی تھی۔
اسپین کے وزیراعظم پیڈرو سانچیز نے پیر کو اس سانحے پر گہرے دکھ اور افسوس کا اظہار کیا۔ انہوں نے سوشل میڈیا پلیٹ فارم ایکس پر لکھا، "آج آدموز میں پیش آنے والے المناک ریلوے حادثے کے باعث ہمارا ملک شدید غم میں ڈوبا ہوا ہے ۔” اسپین کے شاہی خاندان نے بھی متاثرہ خاندانوں سے تعزیت کا اظہار کیا۔
وزیر ٹرانسپورٹ پونتے نے اس ٹکراؤکو’انتہائی خوفناک‘ قرار دیتے ہوئے کہا کہ مالاگا-میڈرڈ ٹرین کے آخری دو ڈبے پٹری سے اتر کر سامنے سے آنے والی ٹرین کے ابتدائی دو ڈبوں سے ٹکرا گئے ، جس کے باعث وہ بھی پٹری سے اتر گئے ۔
اندلوسیا کے علاقے سے ہنگامی امدادی ٹیموں کو جائے حادثہ پر تعینات کیا گیا، جبکہ مقامی رہائشیوں نے معمولی زخمی مسافروں کو ابتدائی طبی امداد کے لیے قریبی اسپورٹس سینٹر منتقل کرنے میں مدد کی۔ اسپین کی ملٹری ایمرجنسی یونٹ کو بھی امدادی کارروائیوں کے لیے طلب کر لیا گیا۔
اتوار کی رات گئے تک امدادی کارروائیاں جاری رہیں، جبکہ حکام نے خبردار کیا کہ ہلاکتوں میں مزید اضافہ ہو سکتا ہے ۔ متاثرہ ریلوے لائنوں پر ٹرین سروس کم از کم منگل تک معطل رہے گی۔
ریلوے انفراسٹرکچر آپریٹر آدیف نے اعلان کیا کہ متاثرہ مسافروں کے لواحقین کو معلومات فراہم کرنے کے لیے میڈرڈ کے آتوچا اسٹیشن، مالاگا اور ہوئیلوا میں خصوصی مراکز قائم کیے گئے ہیں۔ اس کے علاوہ ایک مخصوص ہیلپ لائن بھی قائم کی گئی ہے ۔