ادھمپور میں پٹواری دس ہزار  روپے رشوت لیتے ہوئے گرفتار 

جموں: جموں کشمیر اینٹی کرپشن بیورو (اے سی بی)نے ادھمپور ضلع میں پٹوار حلقہ لدّھا کے پٹواری ‘پردھان سنگھ کو رشوت لیتے ہوئے گرفتار کر لیا۔ بیورو نے اس معاملے میں متعلقہ گرداور کے خلاف بھی مقدمہ درج کیا ہے ۔
ترجمان کے مطابق شکایت گزار نے اے سی بی کو بتایا کہ پٹواری نے وراثتی انتقال اور اس کی نقل فراہم کرنے کے بدلے دس ہزار روپے رشوت کا تقاضا کیا تھا۔ شکایت ملنے کے بعد بیورو نے خفیہ جانچ کی، جس میں رشوت طلب کرنے کی بات درست ثابت ہوئی۔
اس کے بعد اے سی بی پولیس اسٹیشن ادھمپور میں متعلقہ دفعات کے تحت ایک ایف آئی آردرج کی گئی۔ تفتیش آگے بڑھاتے ہوئے ڈپٹی ایس پی کی سربراہی میں ایک ٹیم تشکیل دی گئی، جس نے ایک منصوبہ بند کارروائی کے دوران پٹواری کو پانچ ہزار روپے رشوت لیتے ہوئے رنگے ہاتھوں دھر دبوچا۔
بیورو کے مطابق پٹواری کو آزاد گواہوں کی موجودگی میں گرفتار کیا گیا، جبکہ رشوت کی رقم بھی اسی وقت اس کی تحویل سے برآمد کر لی گئی۔ بعد ازاں اے سی بی نے اس کے سیلان تالاب ادھمپور اور بسنوٹے تحصیل موونگری میں واقع کرائے کے رہائشی مقامات پر مجسٹریٹ کی موجودگی میں تلاشی بھی لی۔
اینٹی کرپشن بیورو کے مطابق معاملے کی مزید تفتیش جاری ہے اور مزید گرفتاریاں خارج از امکان نہیں۔