لودگی معاملے پر ایوان میں بحث ہو اور اس کے تصفئے کے لیے منصوبہ بنایا جائے : راہل

نئی دہلی، 12 دسمبر (یو این آئی)
لوک سبھا میں اپوزیشن کے لیڈر راہل گاندھی نے جمعہ کے روز دارالحکومت سمیت ملک کے بڑے شہروں میں دم گھونٹ دینے والی آلودگی کا معاملہ اٹھاتے ہوئے کہا کہ ایوان میں اس پر تفصیلی بحث کرکے اس سنگین معاملے کے تصفئے کے راستے تلاش کیے جانے چاہئیں۔
مسٹر گاندھی نے وقفہ صفر کے دوران کہا کہ بچوں اور بزرگوں سمیت سبھی کو آلودگی کی وجہ سے شدید مشکلات کا سامنا ہے ۔ بڑوں کے لیے آلودگی کی وجہ سے سانس لینا بھی دشوار ہو رہا ہے ۔ شہری علاقوں، خاص طور پر میٹرو شہروں میں بڑی تعداد میں لوگ سانس کی بیماریوں میں مبتلا ہو رہے ہیں۔ کینسر جیسی مہلک بیماری میں بھی آلودگی کی وجہ سے اضافہ ہورہا ہے ۔
انہوں نے کہا کہ آلودگی پر ہونے والی بحث میں الزام تراشی سے بالا ہوکر ملک کو یہ پیغام جانا چاہیے کہ اس سنگین معاملے کے حل کے لیے تمام سیاسی جماعتیں متفق ہیں۔ انہوں نے کہا کہ صاف ہوا میں سانس لینا عوام کا بنیادی حق ہے اور اس معاملے سے نمٹنے کے لیے ایسی منصوبہ بندی کی ضرورت ہے جس سے مؤثر حل نکل سکے ۔
راہل گاندھی نے کہا کہ محض تشویش ظاہر کرنے یا یہ کہہ دینے سے کہ آلودگی کم کرنے کی کوششیں جاری ہیں، مسئلہ حل نہیں ہوگا۔ اس بڑے بحران سے نجات پانے کے لیے ٹھوس اور مؤثر اقدامات کرنے ہوں گے ۔
اس پر پارلیمانی امور کے وزیر کرن رجیجو نے کہا کہ حکومت آلودگی کے مسئلے پر بحث کے لیے تیار ہے ۔ اس مسئلے کو بزنس ایڈوائزری کمیٹی کی میٹنگ میں رکھا جائے گا اور بعد میں ایوان کو آگاہ کیا جائے گا۔ انہوں نے کہا ”ہم تمام اہم موضوعات پر بحث کے لیے تیار ہیں۔”