دلی میں فضائی معیار میں بہتری، لیکن صورتحال اب بھی سنگین’

نئی دہلی، 10 دسمبر (یو این آئی)
بدھ کی صبح دلی کے فضائی معیار میں قدرے بہتری آئی لیکن صبح 9:10 بجے فضائی معیار کا اشاریہ (اے کیو آئی) 220 ریکارڈ کیا گیا جس سے یہ اب بھی ‘سنگین’ زمرے میں برقرار رہا۔ آلودگی کی روک تھام سے متعلق مرکزی بورڈ نے منگل کی شام کواے کیو آئی 282 ریکارڈ کیا تھا جس میں بدھ کی صبح گراوٹ درج کی گئی لیکن پھر بھی دارالحکومت میں دھند چھائی رہی۔
آج یہاں پی ایم 2.5 کی سطح 144 مائکروگرام فی مکعب میٹر اور پی ایم 10 کی سطح 187 مائکروگرام فی مکعب میٹر ناپی گئی۔ شہر کے کئی حصوں میں صبح گہری دھند چھائی رہی جس سے حد بصارت کافی کم ہو گئی تھی۔ منگل کو انڈیا گیٹ، کرتویہ پتھ، آئی ٹی او، آنند وہار اور غازی پور جیسے علاقوں میں بھی ایسی ہی صورتحال دیکھی گئی تھی۔
کئی مقامات پر AQI اب بھی بہت خراب’ زمرے میں ہے ۔ جہاں گیرپوری میں اے کیو آئی313، وزیر پور میں 305 اور وویک وہار میں 306 ریکارڈ کیا گیا۔ اس دوران کچھ علاقوں میں صورتحال کچھ بہترہوئی۔ چاندنی چوک میں اے کیو آئی 281 رہا، جبکہ آر کے پورم، پنجابی باغ اور آئی آئی ٹی دلی میں بالترتیب 283، 279 اور 218 اے کیو آئی درج کیا گیا۔
دلی کی وزیر اعلیٰ ریکھا گپتا نے کہا ہے کہ’ حکومت دلی میں فضائی آلودگی کے ہر چھوٹے اور بڑے ذریعہ کو کنٹرول کرنے کے لیے مسلسل کوشش کر رہی ہے ۔’ انہوں نے ایکس’ پر لکھا،”ہماری حکومت آلودگی کو کنٹرول کرنے کے لیے جنگی سطح پر کام کر رہی ہے ، جبکہ کچرا ہٹانے کی ایک وسیع مہم بھی چل رہی ہے ۔ دلی میں آلودگی کنٹرول اور صفائی دونوں مہمیں مشن موڈ میں چل رہی ہیں۔”