کیرن میں ایل او سی پر در اندازی کی کوشش ناکام دو دہشت گرد ہلاک:فوج

سرینگر/۸نومبر
فوج کا کہنا ہے کہ شمالی کشمیر کے ضلع کپوارہ کے کیرن سیکٹر میں لائن آف کنٹرول (ایل او سی) پر انسداد در اندزی کے ایک آپریشن کے دوران۲دہشت گردوں کو ہلاک کر دیا گیا جبکہ علاقے میں آپریشن ہنوز جاری ہے ۔
فوج کی چنار کور نے’ایکس‘پر ایک پوسٹ میں کہا’’سیکورٹی فورسز نے کپوارہ کے کیرن سیکٹر میں جاری آپریشن کے دوران دو دہشت گردوں کو ہلاک کر دیا‘‘۔
قبل ازیں انہوں نے کہا’’۷نومبر۲۰۲۵کو‘ ایجنسیوں کے مخصوص انٹیلی جنس ان پٹ کی بنیاد پر، دراندازی کی کوشش کے سلسلے میں، کپوارہ کے کیرن سیکٹر میں ایک مشترکہ آپریشن شروع کیا گیا‘‘۔
انہوں نے کہا کہ الرٹ جوانوں نے مشکوک سرگرمی دیکھ کر چیلنج کیا جس کے نتیجے میں دہشت گردوں نے اندھا دھند فائرنگ شروع کردی اور طرفین کے درمیان رابطہ قائم ہوا اور دہشت گرد پھنس گئے ۔ فوج کا کہنا ہے کہ علاقے میں وسیع پیمانے پر تلاشی آپریشن جاری ہے ۔ایجنسیز