سرینگر/۸نومبر
جموں و کشمیر کی اسٹیٹ انویسٹی گیشن ایجنسی (ایس آئی اے )نے ایک بڑی کامیابی حاصل کرتے ہوئے منشیات و دہشت گردی سے وابستہ ایک اہم سرغنہ کو ممبئی ایئرپورٹ سے گرفتار کرلیا۔
پولیس کے ایک ترجمان کے مطابق گرفتار شخص کی شناخت محمد ارشد عرف آصف ولد محمد رشید ساکن دیگوار تیروان، تحصیل حویلی، ضلع پونچھ کے طور پر ہوئی ہے‘ جو۲۰۲۳ سے مفرور تھا اور سعودی عرب سے سرگرم تھا۔
یہ مقدمہ مئی ۲۰۲۳ میں اس وقت درج کیا گیا جب قابلِ اعتماد ذرائع سے اطلاع ملی کہ پیر پنجال خطے میں ایک منشیات اور دہشت گردی سے جڑا نیٹ ورک سرگرم ہے۔
ترجمان کے مطابق پولیس اور فوج کی جانب سے ۳۰؍ اور ۳۱ مئی ۲۰۲۳ کی درمیانی شب مشترکہ تلاشی کارروائی کے دوران دہشت گردوں اور فورسز کے درمیان فائرنگ کا تبادلہ ہوا۔ اس کارروائی میں چار دہشت گردوں کو گرفتار کیا گیا اور بھاری مقدار میں اسلحہ، گولہ بارود اور منشیات برآمد کی گئیں۔
تحقیقات میں آٹھ افراد کے ملوث ہونے کا انکشاف ہوا جن میں سے دو مفرور تھے۔ ایک مفرور لطیف احمد کو ایس آئی اے جموں نے مارچ۲۰۲۵ میں سردار ولبھ بھائی پٹیل انٹرنیشنل ایئرپورٹ، احمد آباد سے گرفتار کیا تھا، جو واقعے کے فوراً بعد دبئی فرار ہوگیا تھا۔
دوسرا مفرور محمد ارشد عرف آصف اس نیٹ ورک کا مرکزی کردار اور پاکستان میں بیٹھے دہشت گرد ہینڈلرز اور جموں و کشمیر کے مقامی آپریٹرز کے درمیان کلیدی رابطہ تھا۔ اس نے لطیف احمد کے دبئی فرار میں مدد کی اور سورانکوٹ علاقے میں ایک خفیہ میٹنگ کا اہتمام کیا تاکہ پیر پنجال خطے میں دہشت گردی اور منشیات کے ذریعے سرگرمیوں کو دوبارہ فعال کیا جاسکے۔
ایس آئی اے جموں نے ۲۰۲۳میں ہی محمد ارشد عرف آصف کے خلاف لوک آؤٹ سرکلر (ایل او سی) جاری کیا تھا، جس کے بعد غیر ضمانتی وارنٹ بھی عدالت سے حاصل کیا گیا۔ ملزم کو ممبئی سے تین روزہ عبوری ریمانڈ پر حراست میں لیا گیا ہے۔
اس کی گرفتاری منشیات سے منسلک دہشت گردی اور سرحد پار تخریبی نیٹ ورکس کے خاتمے کے لیے ایس آئی اے جموں و کشمیر کی جاری کوششوں میں ایک اہم پیش رفت قرار دی جا رہی ہے۔ندائے مشرق خبر
