آپریشن سندور کے چھ ماہ بعد، لشکر اور جیش کا جموں کشمیر میں نیا حملے کا منصوبہ

سری نگر/۵نومبر
این ڈی ٹی وی کو حاصل خفیہ اطلاعات کے مطابق پاکستان کی پشت پناہی میں جموں و کشمیر کو نشانہ بنانے والی دہشت گردانہ سرگرمیوں میں خطرناک اضافہ دیکھنے میں آیا ہے۔
بھارت کے آپریشن سِندور‘ جو پہلگام دہشت گرد حملے کے جواب میں شروع کی گئی ایک ٹھوس انسدادِ دہشت گردی مہم تھی‘ کے چھ ماہ بعد، رپورٹ سے پتا چلتا ہے کہ پاکستان میں مقیم دہشت گرد تنظیمیں، بالخصوص لشکرِ طیبہ اور جیشِ محمد مربوط حملوں کی نئی لہر کے لیے تیاری کر رہی ہیں۔
خفیہ ڈوزیئر کے مطابق، ستمبر سے دہشت گرد گروہوں نے دراندازی، جاسوسی اور سرحد پار لاجسٹکس میں تیزی لائی ہے۔ متعدد لشکر اور جیش کی یونٹس مبینہ طور پر لائن آف کنٹرول (ایل او سی) کے ساتھ مختلف دراندازی راستوں سے جموں و کشمیر میں داخل ہوئی ہیں، جنہیں پاکستان کی اسپیشل سروسز گروپ (ایس ایس جی) اور انٹر سروسز انٹیلی جنس (آئی ایس آئی) کے اہلکاروں کی مدد حاصل تھی۔
ذرائع کے مطابق، دہشت گرد شمشیر کی قیادت میں لشکر کی ایک یونٹ نے ڈرونز کے ذریعے فضائی نگرانی کی، جس سے ایل او سی کے کمزور حصے شناخت کیے گئے۔ یہ آئندہ ہفتوں میں ممکنہ فدائین طرز کے حملوں یا ہتھیاروں کی ہوائی ترسیل کی نشاندہی کرتا ہے۔
مزید انٹیلی جنس تجزیوں سے معلوم ہوا ہے کہ پاکستان کی بارڈر ایکشن ٹیمیں (بی اے ٹی ایس)، جن میں سابق ایس ایس جی اہلکار اور دہشت گرد شامل ہیں، کو دوبارہ پاکستان کے زیر قبضہ کشمیر (پی او کے) میں تعینات کیا گیا ہے، جو بھارت کی چوکیوں پر ممکنہ سرحد پار حملوں کا اشارہ ہے۔ یہ آپریشن سندور کے بعد کی سب سے منظم سرگرمیوں میں سے ایک ہے، جو پاکستان کی جانب سے یونین ٹیریٹری میں ’عدم استحکام برآمد کرنے‘ کی نئی حکمتِ عملی کو ظاہر کرتی ہے۔
اطلاعات کے مطابق، اکتوبر ۲۰۲۵ میں پی او کے میں اعلیٰ سطحی اجلاس ہوئے جن میں جماعتِ اسلامی، حزب المجاہدین کے سینئر ارکان اور آئی ایس آئی کے افسران نے شرکت کی۔
ان اجلاسوں میں، جو کہ خفیہ رابطوں کے ذریعے افشا ہوئے، یہ منصوبہ طے پایا کہ غیر فعال دہشت گرد سیل دوبارہ سرگرم کیے جائیں، سابق کمانڈروں کو ماہانہ وظیفے دیے جائیں، اور گروہوں کو آپریشن سندور کے دوران ہونے والے نقصانات کا بدلہ لینے کے لیے متحرک کیا جائے۔
رپورٹ میں کہا گیا ہے کہ آئی ایس آئی کے ہینڈلرز نے دہشت گرد تنظیموں کو ہدایت دی ہے کہ وہ بھارتی سکیورٹی فورسز اور سیاسی کارکنوں کے خلاف ’جوابی حملے‘ تیز کریں۔
ایک خطرناک نئے پہلو کے طور پر، لشکر کے کارندوں نے وادی کشمیر بھر میں اپنے مقامی ہمدردوں اور سہولت کاروں کا نقشہ بنانا شروع کر دیا ہے، اس انسانی انٹیلی جنس نیٹ ورک کو بحال کرتے ہوئے جو رواں سال کے اوائل میں بھارت کی سخت انسدادِ دہشت گرد کارروائیوں کے بعد بڑی حد تک تباہ ہو چکا تھا۔ اس کے ساتھ ساتھ منشیات اور اسلحہ اسمگلنگ کے متوازی راستوں کو بھی وسعت دی جا رہی ہے تاکہ دہشت گرد سرگرمیوں کی مالی معاونت کی جا سکے‘وہی طرزِ عمل جو رواں سال پنجاب اور راجستھان کے کچھ حصوں میں دیکھا گیا۔
یہ تازہ پیش رفت ایسے وقت میں سامنے آئی ہے جب جموں و کشمیر میں ایک نازک سکون کی فضا قائم ہے، جہاں مقامی انتخابات اور سیاحت کی بتدریج بحالی کو معمول کی واپسی کی علامت سمجھا جا رہا ہے۔ تاہم سکیورٹی ایجنسیاں خبردار کر رہی ہیں کہ آئی ایس آئی کے زیر سایہ دہشت گرد نیٹ ورک اس پیش رفت کو سبوتاڑ کرنے کی کوشش کر رہا ہے، خاص طور پر ایسے وقت میں جب پاکستان کو دہشت گردی کی سرپرستی پر عالمی تنہائی کا سامنا ہے۔
اپریل ۲۰۲۵ سے، اسلام آباد کے بگڑتے ہوئے معاشی بحران اور سیاسی عدم استحکام نے اس کے مقتدر حلقوں میں سخت گیر دھڑوں کو مزید شہ دی ہے کہ وہ لائن آف کنٹرول کے ساتھ پراکسی تنازع کو دوبارہ بھڑکائیں۔
نئی دہلی میں اعلیٰ حکام نے ان خفیہ اطلاعات کو ’انتہائی اہم انتباہ‘ قرار دیا ہے اور اشارہ دیا ہے کہ بھارتی فوج اور انٹیلی جنس نظام شمالی کمانڈ کے تمام سیکٹروں میں ہائی الرٹ پر ہیں۔ آپریشن سندور، جس نے رواں سال کے اوائل میں لشکر اور ٹی آر ایف کے متعدد نیٹ ورکس کو تباہ کیا تھا، اگر پاکستان کی ’دہشت گردی کی برآمد‘جاری رہی تو ممکن ہے جلد اپنے اگلے مرحلے میں داخل ہو۔
یہ انٹیلی جنس اطلاعات اس وقت سامنے آئی ہیں جب بھارت اپنی مغربی سرحدوں‘گجرات اور راجستھان ‘ میں اب تک کی سب سے بڑی سہ سروسز مشق ترشول انجام دے رہا ہے۔ جیسے جیسے سردی قریب آ رہی ہے، جو عموماً دراندازی میں کمی کا موسم سمجھا جاتا ہے، ماہرین نے خبردار کیا ہے کہ پاکستان کی یہ نئی جارحیت جموں و کشمیر میں دہشت گردی کے طویل سرد موسم کی شروعات ہو سکتی ہے ‘ ایک ایسا موسم جو ایک بار پھر بھارت کی چوکنّی نظر اور عزم کا امتحان لے گا۔(بشکریہ این ڈی ٹی وی) (ندائے مشرق ڈیسک)