۴؍اور۵نومبر کو بالائی علاقوں میں برفباری کا امکان‘ درجہ حرارت میں کمی آسکتی ہے

سرینگر/ یکم نومبر
محکمہ موسمیات کی پیش گوئی کے مطابق وادی کشمیر میں۴؍اور۵نومبر کو ہلکے درجے کے برف و باراں کا امکان ہے جس کے ساتھ ہی وادی کے درجہ حرارت میں نمایاں گراوٹ ریکارڈ ہوسکتی ہے ۔
محکمے کی ایڈوائزری کے مطابق اس دوران۴ نومبر کی رات کو کہیں کہیں گرج چمک کے ساتھ تیز ہوائیں بھی چل سکتی ہیں۔
موسمیات محکمے کے ایک ترجمان نے بتایا کہ وادی میں یکم نومبر سے ۳نومبر تک موسم مجموعی طور پر خشک رہنے کا امکان ہے ۔انہوں نے کہا کہ ۴؍اور۵نومبر کو وادی کے میدانی علاقوں میں ہلکی بارشیں جبکہ پہاڑی علاقوں میں ہلکی برف باری ہوسکتی ہے ۔
ان کا کہنا ہے کہ جموں صوبے میں۴نومبر کی شام سے ۵نومبر کی دوپہر تک بارشوں کا امکان ہے ۔ ترجمان نے بتایا کہ بعد میں۶نومبر سے۱۳نومبر تک موسم ایک بار پھر عام طور پر خشک رہنے کی توقع ہے ۔
محکمے نے اپنی ایڈوائزری میں کہا کہ۴نومبر کی رات کو کہیں کہیں گرج چمک کے ساتھ تیز ہوائیں بھی چل سکتی ہیں۔انہوں نے کہا کہ وادی میں۵نومبر کے بعد درجہ حرارت میں نمایاں گراوٹ درج ہونے کا امکان ہے ۔
کسانوں کو مشورہ دیا گیا ہے کہ وہ۴؍اور۵نومبر کو اپنی زرعی سرگرمیاں معطل رکھیں۔
ادھر وادی میں ہفتے کو صبح سے ہی مطلع صاف رہا اور ہلکی سی دھوپ بھی چھائی رہی جس سے لوگوں کو لطف اندوز ہوتے ہوئے دیکھا گیا گیا جبکہ دوسری طرف کسانوں کو اپنے کھیت کھلیانوں میں مخلتف کاموں میں مصروف دیکھا گیا۔یو این آئی