منشیات کا بڑھتا استعمال:اودھمپور میں رواں سال کے پہلے۱۰ماہ۱۶۸؍افراد گرفتار

جموں/ یکم نومبر
منشیات کے خلاف پر عزم مہم کو جاری رکھتے ہوئے جموں وکشمیر پولیس نے ضلع اودھم پور میں سال رواں کے پہلے۱۰ماہ کے دوران این ڈی پی ایس ایکٹ کے تحت ۱۱۶مقدمے درج کئے ہیں اور۱۶۸؍افراد کو گرفتار کیا ہے ۔
ایک پولیس ترجمان نے اپنے ایک بیان میں کہا کہ اودھم پور پولیس نے ضلع بھر سال رواں کے ماہ جنوری سے ماہ اکتوبر تک این ڈی پی ایس ایکٹ کے تحت کل۱۱۶مقدمے درج کئے ہیں جن میں۱۶۸؍افراد کو گرفتار کیا گیا ہے ۔
انہوں نے کہا کہ گرفتار شدگان میں سے ۱۵۰کو این ڈی پی ایس ایکٹ جبکہ ۱۸؍افراد کو پی آئی ٹی این ڈی پی ایس/ پی ایس اے کے تحت حراست میں لیا گیا ہے ۔
ان کا کہنا ہے کہ اس دوران سخت اقدامات کے تحت۵۳گاڑیاں جو منشیات کی اسمگلنگ میں استعمال ہو رہی تھیں، ضبط کر دی گئیں جبکہ۱۰فارمیسی دکانیں ایچ ایک ادویات سے متعلق خلاف ورزیوں پر سیل کر دی گئیں۔
پولیس ترجمان نے بتایا کہ سال رواں کے پہلے۱۰ماہ کے دوران ضبط شدہ منشیات کی مالیت۴۵ء۸کروڑ رویے ہے جس میں۱۸ء۱کلو ہیروئن‘۱۳ء۱کلو چرس، ۹ء۱۶۰کلو خشخاش بھوسہ اور ۰۶ء۱کلو گانجہ شامل ہے ۔
انہوں نے کہا کہ اس کے علاوہ پنجاری علاقے میں۲کنال۱۰مرلہ اراضی پر پھیلی غیر قانونی افیون کی کاشت کو بھی تباہ کر دیا گیا۔
ان کا کہنا ہے کہ ایک بڑی مالی کارروائی کے تحت منشیات فروشوں کے۵۶بینک کھاتے منجمد کر دئے گئے جن میں کل ۱۷لاکھ۵۹ہزار۸سو ۹۳رویے موجود تھے اور اس کے علاوہ این ڈی پی ایس ایکٹ کے تحت۳۰ء۸کروڑ روپیوں کی جائیدادیں ضبط کی گئیں جن میں۸رہائشی مکان‘۲کانیں‘ایک فلیٹ‘۲۸گاڑیاں‘۲سیونگ اکائونٹس اور ۱۲مرلہ زمین شامل ہے ۔
ترجمان نے بتایا کہ قانونی محاذ پر۴۱مقدمات میں۵۲؍افراد کو سزا سنائی گئی جو اودھم پولیس کی پیشہ ورانہ تفتیش اور قانونی پیروی کی کامیابی کو ظاہر کرتا ہے ۔انہوں نے کہا کہ اودھم پور پولیس ضلع سے منشیات کی بیخ کنی کو یقینی بنانے کیلئے پر عزم ہے ۔
دریں اثناپولیس نے جنوبی کشمیر کے ضلع شوپیاں میں ۲ منشیات فروشوں کو گرفتار کرکے ان کی تحویل سے چرس جیسا ممنوعہ مواد بر آمد کیا ہے ۔
ایک پولیس ترجمان نے بتایا کہ پولیس اسٹیشن زینہ پورہ کی ایک ٹیم نے کشوا ،زینہ پورہ کراسنگ پر ناکے کے دوران دو مشتبہ افراد کو دھر لیا۔
انہوں نے کہا کہ تلاشی کے دوران ان کی تحویل سے تقریباً ۱۹۰گرام چرس جیسا ممنوعہ مواد بر آمد کیا گیا۔
ملزموں کی شناخت محمد زعفران لون ساکن ٹنگر رام بن اور عرفان یتو ساکن ویری ناگ کپرن، جو اس وقت پنڈت کالونی الائو پورہ کیگام میں کام کر رہا تھا، کے طور پر کی گئی ہے ۔
پولیس ترجمان نے بتایا کہ اس ضمن میں پولیس اسٹیشن زینہ پورہ میں این ڈی پی ایس ایکٹ کے متعلقہ دفعات کے تحت زیر ایف آئی آر نمبر۲۰۲۵/۱۰۳ایک مقدمہ درج کیا گیا اور مزید تحقیقات شروع کی گئی۔انہوں نے کہا کہ شوپیاں پولیس سماج سے منشیات کی بیخ کنی کو یقینی بنانے کیلئے پر عزم ہے ۔یو این آئی