انڈیا اتحاد ووٹ بینک کیلئے ملک مخالف سرگرمیوں میں مصروف :بی جے پی

نئی دہلی، 29 اکتوبر (یو این آئی) بھارتیہ جنتا پارٹی (بی جے پی) نے بدھ کے روز کانگریس، ترنمول کانگریس (ٹی ایم سی) اور دراوڑ منیترا کزگم (ڈی ایم کے ) پر شدید حملہ کرتے ہوئے کہا کہ انڈیا اتحاد ووٹ بینک کے لیے ملک مخالف سرگرمیوں کو انجام دے رہا ہے ۔
پارٹی کے ترجمان شہزاد پوناوالا نے بدھ کے روز بی جے پی ہیڈکوارٹر میں منعقد ایک پریس کانفرنس میں آسام کے شری بھومی میں کانگریس پارٹی کی میٹنگ کے دوران پارٹی کے ایک سینئر لیڈر کی جانب سے بنگلہ دیش کا قومی ترانہ گانے پر ردعمل دیتے ہوئے کہا کہ انڈیا اتحاد کی اب ایک ہی پہچان بن گئی ہے ، ”زبان پر آئین، مگر دل میں ووٹ بینک کی دکان۔”
انہوں نے کہا کہ جو کانگریس کل تک پاکستان کو اپنا گھر بتاتی تھی، وہ اب بنگلہ دیش پر مہربان ہو گئی ہے ۔
شہزاد پوناوالا نے الزام لگایا کہ کانگریس ووٹ بینک کی سیاست کے لیے غیر قانونی بنگلہ دیشی دراندازوں اور روہنگیا مسلمانوں کا ساتھ دینے کے ایجنڈے پر اتر آئی ہے ۔ انہوں نے کہا کہ یہ پارٹی کئی برسوں سے بنگلہ دیشی دراندازوں کے ساتھ کندھے سے کندھا ملا کر کھڑی ہے اور یو پی اے کے دورِ حکومت میں ملک میں کروڑوں دراندازوں کو بسانے کا کام کیا گیا۔
انہوں نے مزید کہا کہ اب تو کانگریس پارٹی اپنے پلیٹ فارم سے بنگلہ دیش کا قومی ترانہ گا کر اپنی ہمدردی ظاہر کر رہی ہے ۔
بی جے پی ترجمان نے کہا کہ یہ افسوسناک بات ہے کہ کانگریس اس بنگلہ دیش کا ترانہ گا رہی ہے جس نے ہمارے ملک کے شمال مشرقی حصے ، خصوصاً آسام میں بدامنی پھیلانے کی کوشش کی تھی۔
انہوں نے کہا کہ یہ ‘دراندازوں سے محبت’ صرف کانگریس میں نہیں بلکہ انڈیا اتحاد کے دیگر اتحادیوں میں بھی عام ہے ۔ اس دوڑ میں ترنمول کانگریس اور ڈی ایم کے بھی شامل ہیں۔
شہزاد پوناوالا نے کہا کہ انڈیا اتحاد کی جماعتوں میں خوش آمدی اور ووٹ بینک کی سیاست کے لیے ایک دوسرے سے آگے نکلنے کی دوڑ لگی ہوئی ہے ۔ اسی وجہ سے کانگریس اپنے سرکاری پلیٹ فارم سے دراندازوں کی حمایت کرتی ہے ۔
انہوں نے الزام لگایا کہ ترنمول کانگریس بھی جنگل راج اور شریعت کے نظام کی حامی ہے ۔ مغربی بنگال میں تشدد کرنے والے اور دنگے پھیلانے والے عناصر کو ممتا بنرجی کی حکومت کھلا تحفظ دیتی ہے ۔
بی جے پی ترجمان نے کہا کہ مغربی بنگال میں بی جے پی لیڈروں پر حملوں اور میڈیکل طالبہ سے زیادتی کے واقعے پر ‘آئین بچانے کی بات کرنے والے کانگریس لیڈر راہل گاندھی ایک لفظ بھی نہیں بولتے ۔