شمسی توانائی جامع ترقی کا مظہر بھی ہے :مرمو

نئی دہلی، 28 اکتوبر(یو این آئی)انٹرنیشنل سولر الائنس انسانیت کی اُس مشترکہ خواہش کی علامت ہے جس کا مقصد سورج کی توانائی کو شمولیت، وقار اور اجتماعی خوشحالی کے ذریعے استعمال میں لانا ہے ۔ان خیالات کا اظہار صدرِجمہوریہ ہند محترمہ دروپدی مرمو نے آج نئی دہلی میں انٹرنیشنل سولر الائنس اسمبلی (آئی ایس اے ) کے آٹھویں اجلاس کی افتتاحی نشست سے خطاب کرتے ہوئے کیا۔ 
صدرِجمہوریہ ہند نے کہا کہ ماحولیاتی تبدیلی پوری دنیا کو متاثر کر رہی ہے اور اس خطرے سے نمٹنے کے لیے فوری اور ٹھوس اقدامات کی ضرورت ہے ۔ انہوں نے کہا کہ بندستان ماحولیاتی تبدیلی سے نمٹنے کے لیے پرعزم ہے اور اس سمت میں مضبوط اور مؤثر اقدامات کر رہا ہے ۔ صدرجمہوریہ نے اس بات پر زور دیا کہ انٹرنیشنل سولر الائنس (آئی ایس اے ) شمسی توانائی کے فروغ اور استعمال کو حوصلہ دے کر اس عالمی چیلنج سے نمٹنے کی سمت ایک اہم قدم ہے ۔ 
صدرجمہوریہ نے کہا کہ شمولیت کا تصور ہندستان کے ترقیاتی سفر کی اساس ہے ۔ انہوں نے کہا کہ ملک کے دور دراز علاقوں کے گھروں کو روشنی فراہم کرنے کے تجربے نے اس یقین کو مزید مضبوط کیا ہے کہ توانائی میں مساوات ہی سماجی مساوات کی بنیاد ہے ۔ سستی اور صاف توانائی تک رسائی نہ صرف برادریوں کو بااختیار بناتی ہے بلکہ مقامی معیشت کو مضبوط کرتی ہے اور ایسے نئے مواقع پیدا کرتی ہے جو بجلی کی فراہمی سے کہیں آگے تک جاتے ہیں۔ انہوں نے کہا کہ سولر انرجی صرف بجلی پیدا کرنے کا ذریعہ نہیں بلکہ بااختیاری اور جامع ترقی کا مظہر بھی ہے ۔