اسمبلی سیشن میں کم از کم دو ہفتوں کی توسیع کی جانی چاہئے :بی جے پی

سرینگر/۲۷؍اکتوبر
بی جے پی کے سینئر لیڈر اور رکن اسمبلی ‘رنبیر سنگھ پٹھانیا کا کہنا ہے کہ جموں وکشمیر کے رواں اسمبلی سیشن میں کم از کم دو ہفتوں کی توسیع کی جانی چاہئے ۔
پٹھانیا نے کہا کہ سرکار سوالوں سے بھاگ رہی ہے ۔
بی جے پی لیڈر نے ان باتوں کا اظہار پیر کو یہاں نامہ نگاروں کے ساتھ بات کرنے کے دوران کیا۔
پٹھانیا نے کہا’’سرکار بھاگ رہی ہے ، سرکار جواب دینے سے ڈر رہی ہے پانچ دنوں کا سیشن ہے اس میں مزید توسیع ہونی چاہئے ‘‘۔
ان کا کہنا تھا’’کم از کم دو ہفتوں کا سیشن ہونا چاہئے کیونکہ سیلاب کے بعد یہ پہلا سیشن ہے ، یہ مختصر ترین سیشن ہے ‘‘۔
رکن اسمبلی نے کہا’’تاہم ہم ایک تعمیری اپوزیشن کا رول ادا کریں گے ، اور سرکار سے سوال کریں گے ، سرکار سے پوچھیں گے اس نے جو منشور میں وعدے کئے تھے وہ کب پورے ہوں گے ‘‘۔
عارضی ملازموں کے بارے میں پوچھے جانے پر انہوں نے کہا’’عارضی ملازموں کا مسئلہ اٹھایا جائے گا، جو کمیٹی اس کے لئے بنائی گئی تھی اس کے پیش رفت کے مطابق سوال کئے جائیں گے ‘‘۔
پٹھانیا کا کہنا تھا’’چنائو میں عارضی ملازموں کے ساتھ ایک بار پھر دھوکہ کیا گیا اور ایک بار پھر انہیں بنیادی حقوق سے محروم رکھا گیا۔‘‘