آئی جی پی کا وادی کی سیکورٹی صورتحال کا تفصیلی جائزہ

سرینگر/۲۱؍اکتوبر
انسپکٹر جنرل آف پولیس (آئی جی پی) کشمیر زون، وی کے بردی (آئی پی ایس) نے آج پولیس کنٹرول روم سری نگر میں ایک اہم سیکورٹی جائزہ میٹنگ کی صدارت کی، جس میں جموں و کشمیر پولیس، نیم فوجی دستوں ، فوج اور خفیہ ایجنسیوں کے سینئر افسران شریک ہوئے ۔
میٹنگ کے دوران آئی جی پی کشمیر نے وادی میں موجودہ سیکیورٹی صورتحال کا تفصیلی جائزہ لیا اور افسران کو ہدایت دی کہ وہ سیکورٹی گرڈ کو مزید مضبوط بنانے کے لیے فعال اقدامات کریں۔ انہوں نے کہا کہ حساس علاقوں میں گشت کو تیز کیا جائے ، رات کے اوقات میں چیکنگ میں اضافہ ہو، اور مشتبہ سرگرمیوں کے انسداد کے لیے حقیقی وقت میں انٹیلی جنس معلومات کا تبادلہ یقینی بنایا جائے تاکہ کسی بھی ممکنہ خطرے سے بروقت نمٹا جا سکے ۔
آئی جی پی نے اس بات پر زور دیا کہ تمام فورسز کے درمیان قریبی رابطہ اور مربوط کارروائیوں کو برقرار رکھا جائے ۔ انہوں نے کہا کہ بدلتی ہوئی سیکورٹی چیلنجز سے مؤثر طور پر نمٹنے کے لیے جدید حکمتِ عملی ترتیب دینا وقت کی اہم ضرورت ہے ۔
میٹنگ کے اختتام پر تمام سیکیورٹی ایجنسیوں نے اتفاقِ رائے سے فیصلہ کیا کہ وادی میں امن و امان برقرار رکھنے کے لیے نگرانی کو مزید مؤثر بنایا جائے گا، بینِ ایجنسی تعاون کو مضبوط کیا جائے گا اور حفاظتی اقدامات کو زمینی سطح پر بہتر طور پر نافذ کیا جائے گا۔
ذرائع کے مطابق آئی جی پی کشمیر نے کہا کہ عوام کے تعاون سے ہی امن کے قیام کی کوششیں پائیدار بن سکتی ہیں اور پولیس فورس اس عزم کے ساتھ کام کر رہی ہے کہ وادی میں امن و استحکام برقرار رہے ۔یو این آئی