آر بی اے کوٹہ کم کرنے کا اقدام کشمیریوں کو کمزور کرنے کی کوشش: وحید پرہ

سرینگر/۱۷؍اکتوبر
پی ڈی پی لیڈر اور رکن اسمبلی وحید پرہ نے جموں و کشمیر حکومت پر پسماندہ علاقوں کے رہائشیوں (آر بی اے) کے کوٹہ کو کم کرنے پر تنقید کرتے ہوئے کہا کہ یہ اقدام کشمیریوں کو کمزور کرنے کی ایک کوشش ہے۔
پرہ نے کہا کہ یہ اقدام اس کوٹے پر حملہ ہے جو بنیادی طور پر کشمیری نمائندگی کا تحفظ کرتا ہے۔
پی ڈی پی لیڈر نے ان باتوں کا اظہار جمعہ کو ’ایکس‘ پر اپنے ایک پوسٹ میں کیا۔
پرہ نے کہا’’جموں وکشمیر کی کابینی سب کمیٹی کا ’ریشنالائزیشن‘پر آر بی اے کوٹہ کم کرنے کا فیصلہ کشمیریوں کو کمزور کرنے کی ایک سوچی سمجھی کوشش ہے‘‘۔ان کا کہنا ہے’’ یہ اقدام اس کوٹے پر حملہ ہے جو بنیادی طور پر کشمیری نمائندگی کا تحفظ کرتا ہے‘‘۔
پی ڈی پی ایم ایل اے نے پوسٹ میں کہا’’اس کی تائید کرکے وزیر اعلیٰ برابری کا دفاع نہیں کر رہے ہیں بلکہ با اختیاری کے خاتمے کے ایجنڈے کو آگے بڑھا رہے ہیں‘‘۔
پرہ نے اپنے ایک اور پوسٹ میں کہا’’کشمیریوں نے عمر عبداللہ کو اپنے حقوق کے دفاع کے لئے ایک تاریخی منڈیٹ دیا تھا لیکن وہ دہائیوں میں سب سے زیادہ کشمیر مخالف فیصلے کے ساتھ کھڑے ہیں‘‘۔
پلوامہ کے ممبراسمبلی نے کہا’’نئی ریزرویشن اسکیم کشمیری نمائندگی کو کمزور کرنے کا ایک سیاسی منصوبہ ہے‘‘۔رکن اسمبلی نے کابینی سب کمیٹی کو رپورٹ جاری کرنے کا مطالبہ کیا۔
پی ڈی پی لیڈر نے کہا’’ہم کابینی سب کمیٹی کی رپورٹ کے فوری اجرا کا مطالبہ کرتے ہیں، شیخ محمد عبداللہ نے جس مشن کا آغاز کشمیریوں کی با ختیاری کیلئے کیا تھا آج ان کی اپنی جماعت ہی ایک غیر قانونی بی جے پی زیر اثر ریزرویشن پالیسی کا دفاع کرکے اسی مشن کو الٹا رہی ہے۔‘‘