جموں/۱۵؍اکتوبر
جموں و کشمیر کے ضلع ڈوڈہ میں بدھ کے روز ایک دلخراش واقعہ پیش آیا، جب دو کم عمر لڑکے چرالہ نالہ میں ڈوب کر اپنی جانوں سے ہاتھ دھو بیٹھے۔ واقعہ تحصیل بھیلا کے قریب پیش آیا، جس کے بعد پورے علاقے میں غم و سوگ کی فضا چھا گئی۔
پولیس کے مطابق دونوں لڑکے نالہ کے قریب کھیلنے کے لیے گئے تھے کہ اچانک ان کا پاؤں پھسل گیا اور وہ گہرے پانی میں جا گرے۔ مقامی لوگوں نے ان کی چیخ و پکار سنی تو فوری طور پر موقع پر پہنچے اور پولیس کو اطلاع دی۔
موقع پر پہنچی پولیس اور مقامی رضاکاروں نے بڑی کوششوں کے بعد دونوں کی لاشیں پانی سے باہر نکال لیں۔ مہلوکین کی شناخت اکشے کمار (۱۵) ولد ہمت سنگھ ساکن کامیگا چھگسو اور سوجل سنگھ (۱۵) ولد کشمیر سنگھ ساکن ملہوٹہ پنشائی کے طور پر ہوئی ہے۔
پولیس نے واقعے کی تحقیقات شروع کر دی ہیں، جب کہ لاشوں کو قانونی لوازمات مکمل کرنے کے بعد ورثاء کے سپرد کر دیا گیا۔
مقامی لوگوں نے اس المناک واقعے پر گہرے رنج و غم کا اظہار کرتے ہوئے انتظامیہ سے اپیل کی ہے کہ نالہ کے کناروں پر حفاظتی اقدامات کیے جائیں تاکہ آئندہ اس طرح کے واقعات سے بچا جا سکے۔ایجنسیز
