کیرتی وردھن سنگھ کی مصر کے شرم الشیخ میں غزہ امن سمٹ میں شرکت

وزیر اعظم نریندر مودی کے خصوصی ایلچی کی حیثیت سے ، اتر پردیش کے گونڈا لوک سبھا حلقہ سے رکن پارلیمنٹ اور امور خارجہ کے وزیر مملکت کیرتی وردھن سنگھ نے شرم الشیخ میں امریکی صدر ڈونالڈ ٹرمپ اور مصری صدر عبدالفتح السیسی کی مشترکہ میزبانی میں غزہ امن چوٹی کانفرنس میں شرکت کی۔
وزارت خارجہ کے ترجمان رندھیر جیسوال نے منگل کو سوشل میڈیا پلیٹ فارم ایکس پر ایک پوسٹ میں یہ اطلاع دی۔
مسٹر جیسوال نے لکھا”ہندوستان تاریخی امن معاہدے پر دستخط کا خیرمقدم کرتا ہے اور امید کرتا ہے کہ یہ خطے میں دیرپا امن کا باعث بنے گا۔ یہ معاہدہ بات چیت اور سفارت کاری کے لیے ہندوستان کی دیرینہ وابستگی کا عکاس ہے ۔”
مسٹر سنگھ نے ایکس پر لکھا”مصر کے شرم الشیخ میں غزہ امن اجلاس میں وزیر اعظم نریندر مودی کے خصوصی ایلچی کے طور پر امریکی صدر ڈونالڈ ٹرمپ کے ساتھ اسٹیج کا اشتراک ، سفارتی مشغولیت اور بین الاقوامی تعاون کا ایک اہم لمحہ تھا۔”
امور خارجہ کے وزیر مملکت نے سربراہی اجلاس کے دوران مسٹر ٹرمپ سے ملاقات بھی کی۔ دونوں رہنماؤں نے تقریباً 30 سیکنڈ تک بات کی، اس دوران دونوں رہنما مسکراتے ہوئے دیکھے گئے ۔ سمٹ میں ہندوستان سمیت 24 ممالک کے مندوبین نے شرکت کی۔
تمام مندوبین نے الشیخ امن سربراہی اجلاس کی حمایت کرتے ہوئے دستخط کیے ۔ مسٹر سنگھ نے کہا کہ ہندوستان مغربی ایشیا میں امن کی حمایت کرتا ہے ، مسائل کو بات چیت اور سفارت کاری کے ذریعے حل کرنے کا حامی رہا ہے ۔ انہوں نے صدر ٹرمپ کے غزہ امن منصوبے کی حمایت کی اور اس پر عمل درآمد اور امن کے حصول میں مصر اور قطر کے رول کی ستائش کی۔یو این آئی۔ این یو۔