کناڈا کے وزیر خارجہ کی مودی سے ملاقات، ہندوستان کے ساتھ تعلقات کی نئی جہتوں پر تبادلہ خیال

نئی دہلی، 13 اکتوبر (یو این آئی) ہندوستان اور کناڈا کے درمیان گزشتہ ایک سال سے زیادہ عرصے سے جاری کشیدگی کے بعد دو طرفہ تعلقات کو معمول پر لانے کی سمت اہم قدم کے تحت کناڈا کی وزیر خارجہ انیتا آنند نے وزیر خارجہ ڈاکٹر ایس جے شنکر کے ساتھ بات چیت سے قبل پیر کے روز یہاں وزیر اعظم نریندر مودی سے ملاقات کی۔ دو طرفہ ملاقات کے دوران دونوں ممالک نے مختلف شعبوں میں تعلقات کو مضبوط بنانے اور تعاون کو وسعت دینے کے عزم کی تجدید پر زور دیا۔
مسٹر نریندر مودی نے محترمہ انیتا آنند کا گرمجوشی سے خیرمقدم کرتے ہوئے کہا، "آپ کا دورہ ہند-کناڈا شراکت داری کو مزید مضبوط بنانے کے لیے ہماری مسلسل کوششوں میں نئی رفتار پیدا کرے گا۔” انہوں نے گزشتہ جون میں جی-7 سربراہی اجلاس کے لیے کناڈآ کے دورے کے دوران وزیر اعظم مارک کارنی کے ساتھ اپنی مثبت ملاقات کا بھی تذکرہ کیا۔
ہندوستان اور کناڈآ کے تعلقات حالیہ برسوں میں تجارتی تنازعات اور سیاسی اختلافات کی وجہ سے کشیدہ رہے ہیں، لیکن سفارتی سطح کے حالیہ مذاکرات کے ذریعہ زیادہ مثبت ماحول کو فروغ دیا گیا ہے ۔ دونوں ممالک اب مشترکہ اہداف اور باہمی فائدے پر توجہ مرکوز کرتے ہوئے ماضی کی رکاوٹوں کو دور کرنے کے لیے سرگرم عمل ہیں۔
وزیر اعظم نریندر مودی نے دو طرفہ تعاون کی امید افزا تصویر کا خاکہ پیش کرتے ہوئے کہا، "تجارت، توانائی، ٹیکنالوجی، زراعت، اور عوام سے عوام کے تعلقات میں ہمارا بڑھتا ہوا تال میل دونوں ممالک کی ترقی اور خوشحالی کے لیے اہم ہے ۔” انہوں نے ہندوستان کے بازار اور اختراعی ماحولیاتی نظام میں کناڈا کی بڑھتی ہوئی دلچسپی کی ستائش کی اور صاف توانائی اور ڈیجیٹل ٹیکنالوجی جیسے شعبوں میں اسٹریٹجک شراکت داری کی اہمیت پر زور دیا۔
وزیر اعظم مارک کارنی کے تئیں نیک خواہشات کا اظہار کرتے ہوئے مسٹر مودی نے ان سے آئندہ ملاقاتوں کے لیے مثبت توقع ظاہر کی اور شراکت کو مضبوط بنانے کے لیے اپنی مسلسل عہد بندی کا اشارہ دیا۔
اس میٹنگ سے ہند-کناڈا تعلقات میں اہم موڑ کی نشاندہی ہوتی ہے ، جو کہ بدلتے ہوئے جغرافیائی سیاسی منظر نامے کے درمیان اقتصادی تعلقات کو مضبوط کرنے ، سفارتی تال میل کو بڑھانے اور اجتماعی طور پر عالمی چیلنجوں سے نمٹنے کے مشترکہ وژن کی عکاسی کرتی ہے ۔