جموں/۱۳؍ اکتوبر
لیفٹیننٹ گورنر‘ منوج سنہا نے پیر کے روز کہا کہ ’شمولیت ہی خوشحالی کی کنجی ہے‘۔ انہوں نے کہا کہ گزشتہ چند برسوں میں حکومت کی کوششیں اس بات پر مرکوز رہی ہیں کہ معاشرے کے تمام طبقے جموں و کشمیر کی ترقی کے سفر میں بھرپور طور پر شریک ہوں، اور خصوصی صلاحیتوں کے حامل افراد اپنی صلاحیتوں کو بروئے کار لاکر خوشحالی اور سماجی استحکام میں مؤثر کردار ادا کریں۔
ایل جی سنہا جموں میں جے اینڈ کے سماج کلیان کیندرا کے زیر انتظام سماعت سے محروم بچوں کے اسکول کے ۴۵ویں یومِ تاسیس کے موقع پر خطاب کر رہے تھے۔
سنہا نے کہا کہ کچھ عناصر، اندرونِ ملک اور بیرونِ ملک، ملک کی ترقی کو روکنے کی کوشش کر رہے ہیں، مگر ’’کوئی طاقت ہندوستان کی ترقی کی رفتار کو نہیں روک سکتی۔ ہندوستان ان چیلنجز اور رکاوٹوں پر قابو پا کر مزید طاقتور ابھرے گا‘‘۔
لیفٹیننٹ گورنر نے خصوصی صلاحیتوں کے حامل افراد کے لیے جامع بحالی کے اقدامات پر زور دیا اور کہا کہ تعلیم اور روزگار میں مساوی مواقع فراہم کرنا ایک باوقار اور خودمختار زندگی کے لیے ضروری ہے۔
سنہا نے خصوصی افراد کے بااختیار بنانے کے چار اہم پہلوؤں کی نشاندہی کی‘ان کی صلاحیتوں کی شناخت اور فروغ‘ایسا شمولیتی ماحول پیدا کرنا جو انہیں خود مختار سوچ اور فیصلے کی آزادی دے،ان کے فیصلوں میں مکمل معاونت،
اورخود سیکھنے اور خود بہتر ہونے کے لیے سازگار ماحول کی فراہمی۔
ایل جی سنہا نے جے اینڈ کے سماج کلیان کیندرا کے بانی ڈاکٹر آر۔ آر۔ کھجوریہ کو خراجِ عقیدت پیش کیا اور تنظیم کے تمام اراکین کو معاشرے کے لیے ان کی بے لوث خدمات پر سراہا۔
لیفٹیننٹ گورنر نے اس ادارے کی بہتر کارکردگی کے لیے ہر ممکن سرکاری معاونت کی یقین دہانی کرائی اور کارپوریٹ اداروں، تاجروں اور شہریوں سے اپیل کی کہ وہ بھی اس نیک مقصد میں حصہ لیں۔
تقریب میں خصوصی بچوں نے دلکش پروگرام پیش کیے جنہیں ایل جی نے سراہا۔ اس موقع پرکے بی جنڈیال، ڈاکٹر راکیش کھجوریہ‘ جے۔ کے۔ ویدیا، ڈاکٹر اشوک بھان، محترمہ گنجن رانا‘ سریش کمار شرما، ڈویڑنل کمشنر جموں شری رمیش کمار، شری بی۔ آر۔ شرما اور دیگر سینئر افسران موجود تھے۔
’ڈی آئی پی آر
