جموں/۱۱؍ اکتوبر
جموں انتظامیہ نے ہفتے کو ضلع میں ای۔گاڑیوں (الیکٹرک وہیکلز) کے نظام کو منظم بنانے اور ٹریفک کو رواں رکھنے کیلئے نئے قواعد نافذ کرنے کا اعلان کیا ہے۔
ڈپٹی کمشنر جموں راکیش منہاس نے ضلعی روڈ ٹریفک اتھارٹی (ڈی آر ٹی اے) کی میٹنگ کی صدارت کے بعد بتایا کہ یہ نیا انتظام ۲۳؍ اکتوبر سے نافذ ہوگا اور ابتدائی طور پر تین ماہ تک جاری رہے گا۔
میٹنگ میں سینئر سپرنٹنڈنٹ آف پولیس جموں جوگندر سنگھ، ایس ایس پی ٹریفک فاروق قیصر، ریجنل ٹرانسپورٹ آفیسر جسمیت سنگھ اور مختلف ٹرانسپورٹ یونینوں کے نمائندے شریک ہوئے۔
ایک اہلکار کے مطابق تمام فیصلے تمام فریقین کی باہمی مشاورت سے لئے گئے ہیں۔ نئے ضوابط کے تحت ای۔رکشوں، ای۔آٹوز اور ای۔کارٹس کی نقل و حرکت کو متعین زونز میں محدود کیا گیا ہے تاکہ سڑکوں پر نظم و ضبط قائم رہے اور ٹریفک کا دباؤ کم ہو۔
ای۔گاڑیوں کی آسان شناخت کیلئے ہر زون کیلئے الگ رنگ کی پلیٹ مقرر کی گئی ہے۔اہلکار نے بتایا کہ ای۔گاڑیوں کو ضلع کی حدود میں فلائی اوورز، قومی شاہراہوں اور ریاستی شاہراہوں پر چلنے کی اجازت نہیں ہوگی۔ علاوہ ازیں، جموں سے باہر رجسٹرڈ ای۔گاڑیوں کو ضلع کے اندر چلنے سے روک دیا گیا ہے۔
ڈپٹی کمشنر راکیش منہاس نے واضح کیا کہ ای۔گاڑیاں صرف اپنے متعین زون میں ہی چلیں گی، زونز کے درمیان نقل و حرکت پر پابندی ہوگی سوائے سات مخصوص کراسنگ پوائنٹس کے ۔
ڈی سی منہاس نے تمام آپریٹروں اور متعلقہ فریقین سے تعاون کی اپیل کرتے ہوئے کہا کہ یہ اقدام محفوظ اور مؤثر ٹریفک انتظام کی سمت ایک اہم قدم ہے۔
انہوں نے کہا’’تین ماہ بعد ضوابط کے نفاذ اور عوامی تاثرات کی بنیاد پر اس حکم کا جائزہ لیا جائے گا۔‘‘
