کانگریس نے راہل گاندھی کو دھمکی دینے والے بی جے پی ترجمان کے خلاف کارروائی نہ ہونے پر سوال اٹھائے

نئی دہلی، 29 ستمبر (یواین آئی) کانگریس پارٹی نے لوک سبھا میں اپوزیشن لیڈر راہل گاندھی کے خلاف جان سے مارنے کی دھمکی کی سخت مذمت کرتے ہوئے کہا کہ یہ حیرت کی بات ہے کہ بی جے پی اپنے ترجمان کے خلاف کارروائی نہیں کررہی ہے جس نے مسٹر گاندھی کو جان سے مارنے کی دھمکی دی تھی۔
پارٹی نے پیر کو کہا کہ بی جے پی کے ترجمان کی دھمکی مبالغہ آرائی نہیں بلکہ ایک منصوبہ بند حکمت عملی کا حصہ ہے ۔ کانگریس کے لیے یہ انصاف کی لڑائی ہے اور اس طرح کی دھمکیاں دے کر بی جے پی نے آئین اور جمہوریت پر براہ راست حملہ کیا ہے جو ہر شہری کے تحفظ کی ضمانت دیتا ہے ۔
مسٹر گاندھی کو پہلے بھی مختلف مواقع پر دھمکیاں دی جاتی رہی ہیں، لیکن بی جے پی کے ترجمان کی طرف سے لوک سبھا میں اپوزیشن لیڈر مسٹر گاندھی کو ایک لائیو ٹیلی ویژن شو میں قتل کرنے کی یہ دھمکی ان کے مقاصد پر سنگین سوالات اٹھاتی ہے ۔
ایک بیان میں کانگریس نے سوال کیا کہ کیا بی جے پی جان کی دھمکیوں کی سیاست کی حمایت کرتی ہے کیونکہ مسٹر گاندھی کے خلاف ایک بڑی اور گھناؤنی سازش کی جارہی ہے ۔ اگر نہیں تو بی جے پی کو اپنے ترجمان کے خلاف فوری کارروائی کرنی چاہیے ۔
کانگریس پارٹی نے گالی گلوچ کرنے والے بی جے پی ترجمان پنٹو مہادیو کے خلاف فوری کارروائی کا مطالبہ کیا ہے اور کہا ہے کہ بی جے پی قیادت کو قوم سے معافی مانگنی چاہیے ۔ اس طرح کی دھمکیاں مسٹر گاندھی کو ملک کے لوگوں کے لیے کھڑے ہونے اور آئین کا دفاع کرنے سے نہیں روکیں گی۔
کانگریس کا کہنا ہے کہ یہ بہت سنگین معاملہ ہے اور پارٹی لیڈر کے . وینوگوپال نے اس معاملے پر وزیر داخلہ امت شاہ کو خط لکھ کر ترجمان کے خلاف کارروائی کا مطالبہ کیا ہے ۔