کیا مغل روڈ سرینگر،جموں شاہراہ کا متبادل بن سکتا ہے؟

جب بھی سرینگر،جموں نیشنل ہائی وے (این ایچ۴۴) زمین کھسکنے، لینڈ سلائیڈ یا شدید بارش کے باعث بند ہوتا ہے، وادی کشمیر ایک جانی پہچانی آزمائش سے گزرتی ہے۔ یہ واحد زمینی راستہ ہے جو وادی کو ملک کے باقی حصوں سے جوڑتا ہے، اور جب یہ بند ہو جاتا ہے تو نہ صرف مسافروں کو مشکلات پیش آتی ہیں بلکہ وادی کی معیشت کو بھی بھاری نقصان اٹھانا پڑتا ہے۔ سب سے زیادہ متاثر سیب کے کاشتکار اور تاجر ہوتے ہیں جن کے ٹرک دنوں تک سڑک پر پھنسے رہتے ہیں اور لاکھوں روپے کا نقصان ہوتا ہے۔ اس کے ساتھ ساتھ روزمرہ استعمال کی ضروری اشیاء کی رسد بھی متاثر ہوتی ہے، جس سے قیمتوں میں اضافہ اور عام صارفین کے لیے پریشانی پیدا ہوتی ہے۔
ایسے ہر بحران کے دوران ایک سوال شدت اختیار کر لیتا ہے: کیا تاریخی مغل روڈ سرینگر،جموں شاہراہ کا قابلِ عمل متبادل بن سکتا ہے؟ یہ وہ راستہ ہے جو شوپیاں کو راجوری اور پونچھ کے ذریعے جموں ڈویڑن سے ملاتا ہے اور صدیوں تک تجارت و آمدورفت کا اہم ذریعہ رہا ہے۔ مغل بادشاہوں، تاجروں اور چرواہوں نے صدیوں تک اسی راستے کو استعمال کیا۔ حالیہ دہائیوں میں حکومتوں نے اس سڑک کو دوبارہ قابلِ استعمال بنانے کے لیے سرمایہ کاری بھی کی ہے اور اس کی سیاحتی اہمیت کو اجاگر کرنے کی کوشش بھی کی گئی ہے۔
بظاہر یہ خیال پرکشش ہے کہ جب این ایچ۴۴بند ہو تو مغل روڈ ایک مضبوط متبادل بن کر سامنے آئے۔ لیکن عملی صورتِ حال زیادہ پیچیدہ ہے۔
سب سے بنیادی مسئلہ یہ ہے کہ مغل روڈ ابھی تک اس بھاری بھرکم تجارتی ٹریفک کے لیے تیار نہیں جو روزانہ این ایچ۴۴ سے گزرتی ہے۔ جدید مال برداری کا انحصار کثیر محوری ٹرکوں پر ہے جو بڑی مقدار میں سامان لے کر تیز رفتاری سے چلتے ہیں۔ ایسے ٹرکوں کو چوڑی شاہراہیں، ہموار ڈھلوانیں، مضبوط پل اور پائیدار سڑکوں کی ضرورت ہوتی ہے۔ مغل روڈ تنگ ہے، اس کے موڑ خطرناک اور ڈھلوان زیادہ ہیں۔ یہ اکثر لینڈ سلائیڈز اور برفباری سے متاثر رہتی ہے۔ اس کے بیشتر پل اور نالے بھاری گاڑیوں کے دباؤ کے لیے بنائے ہی نہیں گئے۔ یہی وجہ ہے کہ انتظامیہ بھی مانتی ہے کہ مغل روڈ اس وقت صرف ہلکی یا درمیانی ٹریفک کا بوجھ اٹھا سکتی ہے، پورے کا پورا نہیں۔
یہ مسئلہ صرف تکنیکی نہیں بلکہ انتظامی بھی ہے۔ کسی بھی شاہراہ کو قومی سطح پر قابلِ بھروسہ تجارتی راستہ بننے کے لیے آرام گاہوں، فیول اسٹیشنوں، وزنی پلوں، طبی امدادی مراکز اور ایمرجنسی سہولیات کی ضرورت ہوتی ہے۔ مغل روڈ فی الحال ان سب سہولتوں سے محروم ہے۔ اگر بڑی تعداد میں ٹرک اس پر دوڑائے جائیں تو اس کا نازک ڈھانچہ مزید بوجھ برداشت نہیں کر پائے گا۔ نتیجتاً حادثات اور بندشوں کا خطرہ بڑھ جائے گا۔
اس حقیقت کے باوجود کہ مغل روڈ مکمل متبادل کے طور پر ابھی موزوں نہیں، اس کو یکسر نظر انداز کرنا بھی دانش مندی نہیں۔ حقیقت یہ ہے کہ کشمیر ایک ہی شاہراہ پر انحصار کا متحمل نہیں ہو سکتا۔ ہر بار جب این ایچ۴۴ بند ہوتا ہے تو وادی کو اقتصادی و سماجی بحران کا سامنا کرنا پڑتا ہے۔ سیب کے کسان لاکھوں کا نقصان برداشت کرتے ہیں، تاجروں کا مال ضائع ہوتا ہے اور عام صارفین مہنگائی کے بوجھ تلے دب جاتے ہیں۔ اس لیے کوئی بھی متبادل راستہ‘چاہے وہ مکمل ہو یا جزوی…بہت بڑی ریلیف فراہم کر سکتا ہے۔ اور اس وقت واحد قابلِ عمل متبادل مغل روڈ ہی ہے۔
سوال یہ ہے کہ اس سڑک کو محض ایک وقتی سہارا نہیں بلکہ حقیقی متبادل کیسے بنایا جائے؟ اس کے لیے ہدفی سرمایہ کاری اور عملی منصوبہ بندی درکار ہے۔ کئی مقامات پر سڑک کو چوڑا کرنا ہوگا، خاص طور پر جہاں ڈھلوان تیز اور موڑ اندھے ہیں۔ کچھ پلوں کو دوبارہ تعمیر کر کے مضبوط بنایا جانا چاہیے تاکہ جدید ٹرک ان پر محفوظ گزر سکیں۔ نکاسی آب کے نظام کو بہتر بنانا ہوگا تاکہ بارش یا برف پگھلنے سے سڑک زیادہ متاثر نہ ہو۔ ڈھلوانوں کو محفوظ بنانے کے لیے حفاظتی دیواریں اور جالی نصب کرنا ضروری ہے۔
انتظامی سطح پر بھی کئی اقدامات کیے جا سکتے ہیں۔ مثلاً بھاری گاڑیوں کے لیے وقت کی بنیاد پر قافلوں کا نظام متعارف کرایا جا سکتا ہے تاکہ دن کے محفوظ اوقات میں کنٹرولڈ انداز میں ٹرکوں کو گزارا جائے۔ فی الحال مخصوص محوری بوجھ تک محدود اجازت دی جا سکتی ہے، جب تک کہ سڑک مزید اپ گریڈ نہ ہو جائے۔ ایمرجنسی ریسپانس ٹیمیں تعینات ہونی چاہئیں تاکہ لینڈ سلائیڈز یا برف باری کی صورت میں فوری کارروائی کی جا سکے۔
اس منصوبے کا سب سے بڑا چیلنج سرمایہ ہے۔ مغل روڈ کو جدید تقاضوں کے مطابق اپ گریڈ کرنے کے لیے خطیر رقم درکار ہے۔ تاہم اس کی اسٹریٹجک اہمیت صرف تجارت تک محدود نہیں بلکہ دفاعی اور سیاحتی نقطہ نظر سے بھی بہت زیادہ ہے۔ یہی وجہ ہے کہ مرکز کو اس منصوبے کے لیے سرمایہ کاری کرنی چاہیے۔یہ سرمایہ کاری اپنی لاگت جلد پوری کرے گی کیونکہ این ایچ۴۴ پر بوجھ کم ہونے سے ہر سال وادی کو کروڑوں روپے کے نقصانات سے بچایا جا سکے گا۔
ماحولیاتی پہلو بھی نظرانداز نہیں کیے جا سکتے۔ یہ سڑک نازک پہاڑی خطوں اور حساس جنگلاتی علاقوں سے گزرتی ہے۔ کسی بھی بڑے پیمانے پر اپ گریڈ کے ساتھ ماحولیاتی تحفظ اور جنگلاتی توازن کو یقینی بنانا ہوگا۔
اصل نکتہ یہ ہے کہ مغل روڈ کو مکمل متبادل نہیں بلکہ تکمیلی شاہراہ کے طور پر دیکھا جائے۔ این ایچ۴۴ اپنی وسعت اور ساخت کی وجہ سے ہمیشہ مرکزی راستہ رہے گا۔ لیکن کشمیر کے لیے ضروری ہے کہ وہ متوازی راستے رکھے تاکہ کسی ایک سڑک کی ناکامی پورے خطے کو مفلوج نہ کر دے۔ مغل روڈ کی ترقی، جموں،پونچھ ہائی وے اور زیرِ تعمیر ریلوے منصوبے کے ساتھ مل کر ایک جامع حکمت عملی بنا سکتی ہے۔
آخر میں حقیقت یہی ہے کہ آج کے حالات میں مغل روڈ این ایچ۴۴ کا مکمل متبادل نہیں بن سکتی۔ لیکن اگر دانشمندانہ منصوبہ بندی، ہوشیار سرمایہ کاری اور صبر آزما اپ گریڈ کے ساتھ اسے بہتر بنایا جائے تو یہ ہنگامی حالات میں ایک قابلِ بھروسہ سہارا ثابت ہو سکتی ہے۔ کشمیر جیسے خطے کے لیے، جو طویل عرصے سے ایک ہی راستے پر منحصر رہا ہے، یہ کوئی چھوٹی کامیابی نہیں ہوگی۔