امریکہ ہندوستان کے ساتھ تجارتی مذاکرات کا خواہشمند:ٹرمپ

صدر ڈونالڈ ٹرمپ نے کہا کہ امریکہ اور ہندوستان دونوں ممالک کے درمیان تجارتی رکاوٹوں کو دور کرنے کیلئے بات چیت دوبارہ شروع کریں گے ۔ انہوں نے وزیر اعظم نریندر مودی سے بات کرنے کی خواہش ظاہر کی۔
امریکہ کی جانب سے ہندوستان پر عائد بھاری درآمدی ٹیرف کے باوجود ہندوستان اور امریکہ کے درمیان مجوزہ تجارتی معاہدے پر مثبت پیش رفت دیکھنے میں آرہی ہے ۔
صدر ڈونالڈ ٹرمپ اور وزیر اعظم نریندر مودی نے اپنے اپنے ممالک کے حکام کو ہدایت کی ہے کہ وہ آنے والے ہفتوں میں مذاکرات کو کامیاب انجام تک پہنچائیں۔
صدر ٹرمپ نے سوشل میڈیا پر لکھا’’مجھے یہ اعلان کرتے ہوئے خوشی ہو رہی ہے کہ ہندوستان اور امریکہ کے درمیان تجارتی رکاوٹوں کو دور کرنے کے لیے بات چیت جاری ہے ۔ میں آنے والے ہفتوں میں اپنے بہت اچھے دوست پی ایم مودی سے بات کرنے کا منتظر ہوں۔ مجھے یقین ہے کہ یہ بات چیت دونوں ممالک کے لیے ایک کامیاب نتیجے پر پہنچے گی‘‘۔
امریکی صدر کے بیان کے بعد توقع ہے کہ ہندوستان کا ایک تجارتی وفد آئندہ ہفتے امریکہ روانہ ہوسکتا ہے ۔ یہ وفد دونوں ممالک کے درمیان تجارتی رکاوٹوں پر بات چیت کرے گا اور ایسا معاہدہ یقینی بنانے کی کوشش کرے گا جس سے دونوں ممالک کے لیے تجارتی صورتحال معمول پر رہے ۔
ہندوستان کے وزیر اعظم بھی اپنے حکام کو تجارتی معاہدے پر آگے بڑھنے کی ہدایت کر رہے ہیں۔
مودی نے سوشل میڈیا پر کہا’’ہندوستان اور امریکہ قریبی دوست اور فطری شراکت دار ہیں۔ مجھے یقین ہے کہ ہماری تجارتی بات چیت ہندوستان،امریکہ شراکت داری کے بے پناہ امکانات کو سامنے لانے کی راہ ہموار کرے گی۔ ہماری ٹیمیں ان بات چیت کو جلد از جلد مکمل کرنے کے لیے کام کر رہی ہیں۔ میں صدر ٹرمپ سے بات کرنے کا بھی منتظر ہوں۔ ہم دونوں ممالک کے لوگوں کیلئے روشن اور خوشحال مستقبل کو یقینی بنانے کے لیے مل کر کام کریں گے ‘‘۔
غور طلب ہے کہ ایک امریکی وفد۱۸/۱۷ستمبر کو ہندوستان کا دورہ کرے گا۔ اس دوران ۶پی۸آئی اینٹی سب میرین طیاروں کے حوالے سے ہندوستانی خدشات کو دور کیا جائے گا۔ اس ماہ، دونوں ممالک۱۱۳جی ای۴۰۴طیارہ انجنوں کی خریداری کے معاہدے پر بھی دستخط کریں گے ، جسو تیجس مارک ون اے لڑاکا طیارے کو مضبوطی فراہم کرے گا۔
اس سے قبل امریکہ کی جانب سے ہندوستان کے بارے میں کچھ تنقیدی بیانات سامنے آئے ہیں تاہم ماہرین کا خیال ہے کہ دونوں ممالک کے تعلقات مثبت سمت میں آگے بڑھ رہے ہیں