ہندوستانی فضائی کمپنیوں نے کٹھمنڈو کی تمام پروازیں منسوخ کیں

نئی دہلی، 09 ستمبر (یو این آئی) نیپال میں بگڑتے حالات کے پیش نظر ہندوستانی فضائی کمپنیوں نے کٹھمنڈو کے لیے تمام پروازیں منسوخ کر دی ہیں۔
ٹاٹا گروپ کی فضائی کمپنی ایئر انڈیا کے ایک ترجمان نے منگل کے روز بتایا کہ ایئرلائنز نے دہلی اور کٹھمنڈو کے درمیان آج کی اپنی تمام پروازیں منسوخ کر دی ہیں۔ انہوں نے ایک بیان میں کہا کہ ایئرلائنز صورت حال پر نظر رکھے ہوئے ہے ۔ ایئر انڈیا کی دہلی سے کٹھمنڈو کے لیے آج چار پروازیں طے تھیں جنہیں منسوخ کر دیا گیا ہے ۔ واپسی کی پروازیں بھی منسوخ کر دی گئی ہیں۔
کٹھمنڈو کے لیے خدمات فراہم کرنے والی تیسری کمپنی اسپائس جیٹ نے ابھی تک کوئی ردعمل نہیں دیا ہے ۔ نیپال کی راجدھانی کے لیے اس کی آج کوئی پرواز طے نہیں تھی۔ ایئرلائنز کے ایک افسر نے یواین آئی کو بتایا کہ بدھ کی پرواز کے بارے میں ابھی کوئی فیصلہ نہیں کیا گیا ہے ۔
فضائی کمپنی انڈیگو نے سوشل میڈیا پلیٹ فارم ‘ایکس’ پر ایک بیان میں بتایا کہ اس نے کٹھمنڈو میں موجودہ صورت حال اور وہاں ہوائی اڈے کے بند کیے جانے کے پیش نظر کٹھمنڈو کے لیے اور وہاں سے آنے والی اپنی تمام پروازیں فی الحال معطل کر دی ہیں۔ کمپنی نے کہا کہ حالات پر کڑی نظر رکھی جا رہی ہے اور ایئرلائنز جلد از جلد خدمات دوبارہ شروع کرنے کے لیے حکام سے رابطے میں ہے ۔