سری نگر ایئرپورٹ پر اسپائس جیٹ طیارہ کی ہنگامی لینڈنگ‘ مسافر محفوظ

دہلی سے سرینگر آنے والی اسپائس جیٹ کی پرواز جمعے کی سہ پہر ایک بڑے حادثے سے بال بال بچ گئی جب دورانِ پرواز طیارے میں اچانک دباؤ کا مسئلہ پیدا ہوگیا۔
فلائٹ نمبر۳۸۵ایس جی میں اُس وقت ۲۰۱مسافر اور سات عملے کے ارکان سوار تھے ۔
ایئرپورٹ حکام کے مطابق، طیارے کے کپتان نے کیبن پریشر میں خرابی ظاہر ہوتے ہی ایئر ٹریفک کنٹرول کو ہنگامی صورتحال سے آگاہ کیا اور ترجیحی لینڈنگ کی درخواست دی۔
طیارہ سہ پہر۳بج کر۲۷منٹ پر بحفاظت سری نگر ایئرپورٹ پر اترا۔ خوش قسمتی سے اس واقعے میں کسی بھی مسافر یا عملے کو کسی قسم کی جسمانی تکلیف یا طبی امداد کی ضرورت پیش نہیں آئی۔
اسپائس جیٹ کے ترجمان نے واقعے کی تصدیق کرتے ہوئے کہا کہ پرواز کے دوران کیبن پریشر میں اچانک اضافہ ہوا جس سے الارم بجنے لگا۔ عملے نے فوری طور پر تمام حفاظتی اقدامات اسٹینڈرڈ آپریٹنگ پروسیجرز کے مطابق مکمل کیے اور کپتان نے احتیاطی طور پر ایمرجنسی لینڈنگ کی اجازت طلب کی۔
ترجمان نے مزید بتایا کہ طیارے کی لینڈنگ مکمل طور پر محفوظ رہی اور تمام مسافر اور عملہ معمول کے مطابق جہاز سے اتر گئے ۔
ایوی ایشن ماہرین کے مطابق کیبن پریشر میں اس نوعیت کے مسائل اگر بروقت قابو میں نہ لائے جائیں تو شدید خطرناک ثابت ہوسکتے ہیں، تاہم اسپائس جیٹ عملے کی بروقت کارروائی نے کسی بھی ممکنہ حادثے کو ٹال دیا