سرینگر//
جموں کشمیر کے محکمہ دیہی ترقی اور پنچایتی راج نے مختلف سوشل میڈیا پلیٹ فارمز پر بڑے پیمانے پر گردش کیے جانے والے ایک جعلی سرکاری حکم نامے‘ جس میں جھوٹا دعوی کیا گیا ہے کہ مرکز کے زیر انتظام علاقے میں پنچایت انتخابات نومبر ۲۰۲۵ کے بعد کرائے جائیں گے‘ کے بارے میںوضاحت جاری کی ہے ۔
محکمہ نے ایک بیان میں کہا ہے’مرکز کے زیر انتظام علاقے جموں کشمیر میں پنچایت انتخابات کا انعقاد،نومبر ۲۰۲۵ کے بعد‘ کے عنوان سے ایک مبینہ سرکاری نوٹیفکیشن جس پر ۲۰۲۵ کا آرڈر نمبر:۴۵۔آر ڈی اینڈ پی آر اور تاریخ۵؍اگست۲۰۲۵ آن لائن شیئر کیا جا رہا ہے‘‘۔
محکمہ آر ڈی ڈی اینڈ پی آر کے عہدیداروں نے اس بات کی تصدیق کی ہے کہ محکمہ کی طرف سے ایسا کوئی حکم جاری نہیں کیا گیا ہے۔ گردش میں موجود دستاویز من گھڑت اور گمراہ کن ہے۔
عہدیداروں نے بتایا کہ پنچایت انتخابات کے شیڈول کو مطلع کرنے کے لیے ریاستی الیکشن کمیشن واحد مجاز اتھارٹی ہے ، اور ابھی تک سرکاری طور پر ایسی کسی ٹائم لائن کا اعلان نہیں کیا گیا ہے۔
اس میں کہا گیا ہے’’عام لوگوں کو مشورہ دیا جاتا ہے کہ وہ اس طرح کی غلط معلومات کا شکار نہ ہوں‘‘۔
محکمہ دیہی ترقی کے ایک سینئر عہدیدار نے کہا کہ جعلی سرکاری احکامات کو پھیلانا انفارمیشن ٹیکنالوجی ایکٹ اور تعزیرات ہند کی متعلقہ دفعات کے تحت قابل سزا جرم ہے۔
محکمہ نے شہریوں پر زور دیا ہے کہ وہ انتخابات یا دیگر انتظامی معاملات سے متعلق کسی بھی اپ ڈیٹ کے لیے صرف سرکاری چینلز اور تصدیق شدہ مواصلات پر انحصار کریں۔ جعلی دستاویز بنانے اور شیئر کرنے کے ذمہ داروں کے خلاف سخت کارروائی شروع کی جا رہی ہے۔
