سرینگر//
اینٹی کرپشن بیورو(اے سی بی) نے ضلع کولگام میں تعینات ایک پٹواری مشتاق احمد کھٹانہ کو۲۳ہزار روپے رشوت لیتے ہوئے رنگے ہاتھوں گرفتار کر لیا ہے ۔
اے سی بی کے مطابق انہیں ایک تحریری شکایت موصول ہوئی، جس میں شکایت کنندہ نے بتایا کہ اس نے تحصیل دفتر پہلو، کولگام میں ایک درخواست جمع کرائی ، جس میں اخروٹ کے درخت کاٹنے کی اجازت مانگی گئی تھی۔ اس درخواست کو متعلقہ پٹواری حلقہ بانیمولہ کے پاس رپورٹ کے لیے بھیجا گیا۔
شکایت کنندہ نے الزام لگایا کہ جب وہ پٹواری مشتاق احمد کھٹانہ ولد محمد ایوب کھٹانہ ساکن کرالو کنڈ کولگام کے پاس گیا، تو پٹواری نے اس سے رپورٹ تیار کرنے کے عوض ۲۳ہزار روپے رشوت کا مطالبہ کیا۔
شکایت کنندہ نے رشوت دینے کے بجائے معاملے کو اینٹی کرپشن بیورو کے سامنے رکھا۔ ابتدائی جانچ میں شکایت درست پائی گئی، جس کے بعد اے سی بی نے تھانہ اننت ناگ میں کیس درج کرکے تحقیقات شروع کی گئی۔
اینٹی کرپشن بیورو نے فوری طور پر ایک خصوصی ٹیم تشکیل دی جس نے کامیاب جال بچھا کر پٹواری مشتاق احمد کھٹانہ کو رشوت لیتے ہوئے رنگے ہاتھوں گرفتار کر لیا۔
اس کی گرفتاری آزاد گواہوں کی موجودگی میں عمل میں لائی گئی، اور رشوت کی رقم بھی اس کے قبضے سے برآمد کی گئی۔
ترجمان کے مطابق مجسٹریٹ اور آزاد گواہوں کی موجودگی میں رشوت خور پٹواری کے گھر کی بھی تلاشی لی گئی۔انہوں نے کہا کہ اس معاملے کی تفتیش جاری ہے اور جلد ہی مزید تفصیلات منظر عام پر لائی جائیں گی۔
