سرینگر//
جموں کشمیر میں دہشت گردی کے ماحولیاتی نظام کو بے نقاب کرنے کی ایک بڑی کارروائی کے تحت اسٹیٹ انویسٹی گیشن ایجنسی (ایس آئی اے ) نے جمعہ کو جموں، ڈوڈہ اور ہندواڑہ میں بیک وقت تین مشتبہ مقامات پر چھاپے مارے ۔
یہ کارروائیاں فرد جرم نمبر۲۰۲۲/۱۲کے تحت کی گئیں، جو انسداد غیر قانونی سرگرمیاں ایکٹ (یو اے پی اے ) کی دفعات۱۸‘۳۸‘۳۹؍اور تعزیرات قانون ائی پی سی کی دفعات۱۲۰بی‘۱۲۱‘۱۲۱؍اے کے تحت پولیس اسٹیشن ایس آئی اے میں درج ہے ۔
ایس آئی اے کے مطابق یہ چھاپے ایک بین الاقوامی سازش کی گتھی کو سلجھانے کے لیے مارے گئے ، جس میں پاکستان سے کرپٹو کرنسی کے ذریعے فنڈنگ کی جا رہی تھی تاکہ جموں و کشمیر میں دہشت گردی کو بڑھاوا دیا جا سکے ۔ ساتھ ہی ایسے عناصر کی بھی تلاش کی جا رہی ہے جو بھارتی اتحاد کے خلاف نوجوانوں کو اکسا رہے ہیں اور قومی سلامتی کو چیلنج کر رہے ہیں۔
چھاپوں کے دوران اہم شواہد اور الیکٹرانک آلات برآمد کیے گئے ہیں، جو ایس آئی اے کو ان پسِ پردہ نیٹ ورکس اور ساتھیوں کی شناخت میں مدد فراہم کریں گے ، جو اس خفیہ فنڈنگ اور دہشت گرد سرگرمیوں میں ملوث ہیں۔
ایس آئی اے نے ایک بیان میں کہا کہ وہ دہشت گردی اور اس کے جدید سپورٹ سسٹمز، بشمول کرپٹو کرنسی کی بنیاد پر فنڈنگ کے مکمل خاتمے کیلئے پُرعزم ہے
