کاونٹر انٹیلی جنس کشمیر کا خفیہ آپریشن شہریوں کو دھوکہ دینے والا جعلساز گرفتار

سرینگر///
کاؤنٹر انٹیلی جنس کشمیر (سی آئی کے( نے ایک خفیہ آپریشن کے دوران بلال احمد راتھر ولد عبدالصمد راتھر کو جعلی دستاویزات تیار کرنے اور عوام کو دھوکہ دینے کے الزام میں گرفتار کیا ہے ۔
کاؤنٹر انٹیلی جنس کشمیر کے مطابق، بلال احمد، جو کہ آلوچی باغ سرینگر کا رہائشی ہے اور اس وقت زکورہ حضرت بل میں مقیم ہے ‘ نے مبینہ طور پر ایس ایس پی(سی آئی کے ) کے دستخط کے ساتھ جعلی انکوائری نوٹس تیار کی۔ اس جعلی دستاویز کو استعمال کرتے ہوئے اس نے کئی شہریوں سے بڑی رقم وصول کی۔
ذرائع کا کہنا ہے کہ جب متاثرہ افراد نے اپنی رقم کی واپسی کا مطالبہ کیا تو بلال نے بہانہ بنایا کہ اس کے بینک اکاؤنٹس جانچ کے تحت ہیں۔ بعد ازاں اس نے انہیں جعلی نوٹس دکھا کر گمراہ کیا۔
سی آئی کشمیر کی ٹیم نے خصوصی کارروائی کے دوران ملزم کو پوچھ گچھ کے لیے حراست میں لیا، اور ابتدائی تفتیش کے دوران اس کے موبائل فون سے وہ جعلی انکوائری نوٹس بھی برآمد کی گئی جو اس نے متاثرین کو دکھائی تھی۔ بلال احمد نے تفتیش کے دوران اپنے جرم کا اعتراف کر لیا۔
ملزم کو قانونی کارروائی کے لیے پولیس اسٹیشن ذکورہ کے حوالے کر دیا گیا ہے جہاں اس کے خلاف ایف آئی آر نمبر۲۰۲۵/۳۹درج کیا گیا ہے ۔
حکام نے عوام سے اپیل کی ہے کہ وہ ایسے دھوکہ باز افراد سے ہوشیار رہیں اور کسی بھی مشتبہ سرگرمی کی اطلاع فوری طور پر قریبی پولیس اسٹیشن کو دیں تاکہ ایسے عناصر کے خلاف سخت کارروائی عمل میں لائی جا سکے ۔