جموں یونیورسٹی ہوسٹل بالکونی سے گرنے کے باعث طالب علم جاں بحق

جموں//
جموں یونیورسٹی کے لا ڈیپارٹمنٹ کے پانچویں سمسٹر کے ایک طالب علم کی ہوسٹل کی بالکونی سے گرنے کے باعث پراسرار طور پر موت واقع ہوئی ہے ۔
پولیس نے بدھ کے روز اس واقعے کی تصدیق کرتے ہوئے بتایا کہ معاملے کی تفتیش کی جا رہی ہے تاکہ اصل حقائق سامنے لائے جا سکیں۔
پولیس کے مطابق، متوفی کی شناخت وِشال بھاردواج کے طور پر ہوئی ہے ، جو ضلع ریاسی کے کٹرا علاقے کا رہائشی تھا۔ وہ جموں یونیورسٹی کے جمبو لوچن ہوسٹل میں مقیم تھا اور منگل کی رات بالکونی سے نیچے گر کر شدید زخمی ہو گیا، جس کے بعد اُسے فوری طور پر گورنمنٹ میڈیکل کالج جموں منتقل کیا گیا، جہاں ڈاکٹروں نے اُسے مردہ قرار دیا۔
پولیس ذرائع نے بتایا کہ متوفی کی لاش کا پوسٹ مارٹم کرایا گیا ہے تاکہ موت کی وجوہات کا درست تعین کیا جا سکے ۔
فی الحال دفعہ۱۷۴کے تحت انکوائری شروع کر دی گئی ہے تاکہ یہ معلوم کیا جا سکے کہ آیا یہ واقعہ ایک حادثاتی پھسلن کا نتیجہ ہے یا کسی مجرمانہ سازش کا شاخسانہ۔
پولیس کا کہنا ہے کہ تمام پہلوؤں کی باریکی سے تحقیقات جاری ہیں اور طلبا و عملے سے بھی بیانات لیے جا رہے ہیں۔