ہندوارہ میں بدنام زمانہ منشیات فروش کی جائیداد قرق

سرینگر//
منشیات کے خلاف کریک ڈاؤن جاری رکھتے ہوئے جموں و کشمیر پولیس نے ہندوارہ میں ایک بدنام زمانہ منشیات فروش کی لاکھوں روپے مالیت کی غیر منقولہ جائیداد کو ضبط کر لیا ہے ۔
پولیس ترجمان کے مطابق، قلم آباد ہندواڑہ میں سینئر پولیس آفیسران کی نگرانی میں بد نام زمانہ منشیات فروش فیاض احمد بٹ ولد مرحوم عبدالاحد بٹ ساکن جنڈٰ پورہ مارٹ گام کی ملکیتی زمین اور اس پر تعمیر شدہ پِلِنتھ کو ضبط کیا گیا۔
ترجمان نے کہاکہ ابتدائی تحقیقات سے یہ بات سامنے آئی ہے کہ مذکورہ جائیداد منشیات کی غیر قانونی تجارت سے حاصل ہونے والی آمدنی سے خریدی گئی تھی۔ ملزم فیاض احمد بٹ فی الحال ضلع جیل کپواڑہ میں اسی کیس کے تحت زیر حراست ہے ۔
پولیس نے عوام سے ایک بار پھر اپیل کی ہے کہ وہ منشیات کا کاروبار کرنے والوں کے بارے میں پولیس کو اطلاع فراہم کریں۔ پولیس نے یقین دہانی کرائی ہے کہ اطلاع دینے والے کی شناخت کو مکمل طور پر صیغہ راز میں رکھا جائے گا۔