ایل جی کا لال چوک میں بلیدان استمبھ کا دورہ، تاجروں سے کی بات چیت

سرینگر//
جموں کشمیر کے لیفٹیننٹ گورنر منوج سنہا نے منگل کے روز بارشوں کے بیچ سری نگر کے تجارتی مرکز لال چوک کا دورہ کیا اور اس دوران پرتاب پارک میں واقع بلیدان استمبھ (یاد گار شہدا) پر شہیدوں کو خراج عقیدت پیش کیا اور لال چوک کے تاجروں کے ساتھ بات چیت بھی کی۔
سنہا نے’’ایکس‘‘پر ایک پوسٹ میں کہا’’آج لال چوک میں تاجروں کے ساتھ بات چیت کی اور ایک سازگار کاروباری ماحول کو یقینی بنانے کے لیے مرکزی حکومت کے عزم کا اعادہ کیا‘‘۔
منوج سنہا نے قبل ازیں وسطی کشمیر کے ضلع گاندربل کے تولہ مولہ علاقے میں واقع مشہور ماتا کھیر بھوانی مندر میںمیلہ ماتا کھیر بھوانی میں شرکت کی۔
ایل جی نے اس موقع پر کہا کہ میلہ ماتا کھیر بھوانی میں بڑی تعداد میں عقیدت مند شرکت کر رہے ہیں جو ایک اچھا پیغام ہے ۔