سرینگر// جموں و کشمیر اینٹی کرپشن بیورو (اے سی بی) نے آج ہفتے کے روز جنوبی کشمیر کے اننت ناگ ضلع کے علاقے ڈورو میں ایک پٹواری کو دس ہزار روپے رشوت مانگتے اور لیتے ہوئے برہنہ ہاتھوں پکڑا۔
ایک بیان کے مطابق،بیورو کو ایک تحریری شکایت موصول ہوئی جس میں الزام لگایا گیا تھا کہ شکایت کنندہ نے تحصیل دفتر ڈورو میں ایک درخواست جمع کرائی تھی جس میں اپنے گھر کے قریب چنار کے درخت کی شاخیں کٹوانے/تراشوانے کی درخواست کی گئی تھی کیونکہ تیز ہواؤں کی وجہ سے جانیں اور املاک کو نقصان پہنچنے کا خدشہ تھا۔
بیان میں کہا گیا ہے کہ تحصیل دفتر نے اس کی درخواست پٹواری حلقہ لک بھاون لارکی پورہ کو رپورٹ کے لیے بھیجی۔’’جب شکایت کنندہ متعلقہ پٹواری کے پاس پہنچا تو اس نے شکایت کنندہ سے دس ہزار روپے رشوت کا مطالبہ کیا‘‘۔
بیان میں مزید کہا گیا ہے کہ شکایت کنندہ نے رشوت ادا کرنے کے بجائے اینٹی کرپشن بیورو سے رجوع کیا تاکہ پٹواری کے خلاف قانونی کارروائی کی جائے۔ ’’شکایت موصول ہونے پر خفیہ تصدیق کی گئی جس سے پٹواری کی جانب سے رشوت کے مطالبے کی تصدیق ہوئی اور اس کے مطابق تھانہ اے سی بی اننت ناگ میں کیس ایف آئی آر نمبر۰۱/۲۰۲۵ دفعہ۷ پی سی ایکٹ۱۹۸۸کے تحت درج کیا گیا اور تفتیش شروع کی گئی‘‘۔
بیان میں مزید کہا گیا کہ تفتیش کے دوران جال بچھایاگیا اور مذکورہ پٹواری کو شکایت کنندہ سے دس ہزار روپے رشوت کا مطالبہ کرتے اور وصول کرتے ہوئے رنگے ہاتھوں پکڑ لیا گیا۔
بیان کے مطابق اسے اے سی بی ٹیم نے موقع پر ہی حراست میں لے لیا۔ ’’رشوت کی رقم بھی کش ٹیم سے منسلک آزاد گواہوں کی موجودگی میں اس کے قبضے سے برآمد کی گئی۔ بعد ازاں ایگزیکٹو مجسٹریٹس اور آزاد گواہوں کی موجودگی میں اس کے گھر کی تلاشی لی گئی۔ مزید تفتیش جاری ہے۔‘‘
