اودھم پور :۵ماہ میں۲کروڑ روپے کی منشیات ضبط‘۶۲گرفتار

جموں//
منشیات کے اسمگلروں اور پیڈلرز کے گرد گھیرا تنگ کرتے ہوئے جموں و کشمیر پولیس نے ضلع ادھم پور میں سال رواں کے پہلے پانچ مہینوں کے دوران۲کروڑ روپے کا ممنوعہ مواد ضبط کیا ہے جبکہ۶۲افراد کو گرفتار کیا گیا ہے ۔
ایک پولیس ترجمان نے ہفتہ کے روز بتایا کہ اودھم پور پولیس نے ۶۲ملزمان کے خلاف نارکوٹک ڈرگس اینڈ سائیکوٹرپک سبسٹنسز (این ڈی پی ایس) اور پبلک سیفٹی ایکٹ کے تحت۴۴مقدمات درج کیے ہیں جبکہ منشیات کی اسمگلنگ میں استعمال ہونے والی۱۶گاڑیوں کو ضبط کیا گیا ہے اور اس کے ساتھ چار فارمیسی کی دکانوں کو بھی بند کیا گیا ہے ۔
انہوں نے کہا کہ مالیاتی اثاثوں کے خلاف ایک اہم کریک ڈاؤن میں منشیات فروشوں کے۳۵بینک اکاؤنٹس جن کی مالیت ۱۶لاکھ۷۰ہزار۷سو ۳روپے ہے ، کو منجمد کردیا گیا ہے ۔
ترجمان نے بتایا کہ گذشتہ پانچ مہینوں میں کل ۰۷ء۲کروڑ مالیت کا ممنوعہ مواد ضبط کیا گیا اوراین ڈی پی ایس سے متعلقہ اور مویشیوں کی اسمگلنگ کے معاملات میں ۱۹ء۴کروڑ کی جائیدادیں ضبط کی گئیں۔
ترجمان نے کہا کہ پولیس نے عدالتوں سے۲۰مقدمات میں۲۷منشیات فروشوں کو کامیابی سے سزائیں بھی دلوائیں۔