بہادر افسر کی خدمات کا اعتراف آرمی چیف سے اعزاز حاصل

جموں//
چیف آف آرمی اسٹاف جنرل اوپندر دیویدی نے بارڈر سیکورٹی فورس (بی ایس ایف) جموں کی خاتون اسسٹنٹ کمانڈنٹ نیہا بھنڈاری کو ’کمیندیشن ڈسک‘سے نوازا ہے ۔
یہ اعزاز اُنہیں آپریشن سِندورکے دوران غیر معمولی جرأت اور پیشہ ورانہ مہارت کے مظاہرے پر دیا گیا۔
سرکاری ذرائع کے مطابق نیہا بھنڈاری نے ایک انتہائی حساس سرحدی علاقے میں تعینات بی ایس ایف کمپنی کی قیادت نہایت مشکل حالات میں بہادری سے انجام دی۔ اُن کی قیادت اور حکمت عملی نے نہ صرف دشمن کے عزائم کو ناکام بنایا بلکہ آپریشن کی کامیابی میں کلیدی کردار ادا کیا۔
جنرل دیویدی نے نیہا بھنڈاری کی تعریف کرتے ہوئے کہا کہ اُن کی ثابت قدمی، بہادری اور فرض شناسی فورسز کے لیے مشعل راہ ہے ۔ انہوں نے دیگر افسران اور جوانوں پر بھی زور دیا کہ وہ نیہا کی طرح جذبہ خدمت اور پیشہ ورانہ صلاحیتوں کو اپنائیں۔
خیال رہے کہ آپریشن سندور رواں ماہ کے اوائل میں۲۲؍اپریل کے پہلگام دہشت گرد حملے کے بعد جوابی کارروائی کے طور پر کیا گیا تھا، جس میں سرحد پار دہشت گردی کے ٹھکانوں کو نشانہ بنایا گیا۔
فوجی اور نیم فوجی دستوں میں نیہا بھنڈاری کی جرأت اور لیڈرشپ کو بے حد سراہا جا رہا ہے ، اور اُن کا یہ اعزاز خواتین اہلکاروں کی صلاحیتوں کا اعتراف بھی ہے ، جو ملک کی سرحدوں کے تحفظ میں برابر کی شریک ہیں۔