سوشل میڈیا پر یاسین ملک کی تعریف کرنے پر نوجوان گرفتار

سرینگر//
جموںکشمیر پولیس نے شمالی کشمیر کے ضلع بانڈی پورہ میں کالعدم تنظیم جموںکشمیر لبریشن فرنٹ (جے کے ایل ایف) کے سربراہ محمد یاسین ملک اور دیگر علیحدگی پسند رہنماؤں کی سوشل میڈیا پر تعریف کرنے پر ایک نوجوان کو گرفتار کیا ہے ۔
ایک پولیس ترجمان نے اپنے ایک بیان میں بتایا کہ معمول کی سائبر نگرانی اور گشت کے دوران سوشل میڈیا کے منفی ہینڈل چلانے والے ایک نوجوان کی شناخت ملی ٹنسی اور انتہا پسندانہ نظریات کو فروغ دینے والا مواد پوسٹ کرنے کے لیے کی گئی۔
مذکورہ نوجوان کی شناخت سجاد نصیر بٹ عرف ساحل ولد نصیر احمد بٹ ساکن نائد کھائی سمبل کے طور پر کی گئی ہے ۔
ترجمان نے کہا’’اس نوجوان نے جان بوجھ کر جے کے ایل ایف کے سربراہ محمد یاسین ملک اور دیگر کی تصاویر اپنے سوشل میڈیا ہینڈل پر اپ لوڈ کی تھیں تاکہ امن و امان کو خراب کیا جا سکے ‘‘۔
پولیس ترجمان نے کہا کہ مذکورہ نوجوان کو گرفتار کر لیا گیا اور پولیس اسٹیشن سمبل میں بی این ایس کے متعلقہ دفعات کے تحت ایک کیس درج کیا گیا اور مزید تحقیقات شروع کی گئی۔انہوں نے کہا کہ بانڈی پورہ پولیس شدت پسندانہ مواد پھیلانے ، تشدد بھڑکانے یا امن عامہ کو درہم برہم کرنے کی کوشش کرنے والے افراد کی شناخت کے لیے سوشل میڈیا پلیٹ فارمز کی فعال طور پر نگرانی کر رہی ہے ۔
پولیس ترجمان کا بیان میں مزید کہنا تھا’’دہشت گردی کو بڑھاوا دینے ، علیحدگی پسندانہ نظریات کو فروغ دینے یا ملکی سالمیت کے خلاف غلط معلومات پھیلانے کی کسی بھی کوشش سے قانون کے تحت سختی سے نمٹا جائے گا۔‘‘