اننت ناگ آتشزدگی‘۱۶ڈھانچوں کو نقصان ، آگ بجھانے کی کارروائی جاری

سرینگر//
جنوبی ضلع اننت ناگ کے کادی پورہ گاوں میں آتشزدگی کے بھیانک واقعے میں۱۶رہائشی اور کمرشل عمارتوں کو نقصان پہنچا ہے ۔
فائر اینڈ ایمرجنسی کے ایک عہدیدار نے بتایا کہ آگ بجھانے کی کارروائی جاری ہے ۔
اطلاعات کے مطابق جمعرات کی سہ پہر اننت ناگ کے گنجان آبادی والے علاقے کادی پورہ میں رہائشی مکان سے آگ نمودار ہوئی جس نے آناً فاناً پوری بستی کواپنی لپیٹ میں لے لیا۔
فائر اینڈ ایمرجنسی کے ایک عہدیدار نے یو این آئی اردو کو بتایا کہ سہ پہر ۳بجکر ۲۰منٹ پر اننت ناگ کے کادی پورہ گاوں میں آگ نمودار ہونے کی اطلاع موصول ہوتے ہی فائر اینڈ ایمرجنسی کے اہلکار جائے موقع پر پہنچے ۔
عہدیدار نے کہا کہ ابتدائی اطلاعات کے مطابق آتشزدگی کے اس واقعے میں ۱۵سے ۱۶رہائشی اور کمرشل عمارتوں کو نقصان پہنچا ہے ۔انہوں نے مزید بتایا کہ آگ کو مزید پھیلنے سے روکنے کی خاطر تمام تر وسائل کو بروئے کارلایا جارہا ہے ۔
ان کے مطابق آگ پر قابو پانے کے بعد ہی نقصان کے بارے میں مزید تفصیلات فراہم کی جاسکتی ہے ۔آخری اطلاعات موصول ہونے تک آگ بجھانے کی کارروائی جاری تھی۔