سری نگر میں چوری کا معاملہ حل۔ ملزم گرفتار، مسروقہ مال بر آمد:پولیس

سرینگر//
پولیس نے سرینگر میں چوری کے ایک معاملے کو چند گھنٹوں میں ہی حل کرکے ملزم کو گرفتار اور مسروقہ مال کو ضبط کیا ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس اسٹیشن لال بازار کو مقصود احمد بابا ولد عبد الاحد بابا ساکن ارزن صاحب سوپور حال جوگی ون لال بازار کی جانب سے تحریری شکایت موصول ہوئی جس میں کہا گیا کہ جوگیوان لال بازار میں واقع اس کے دکان میں نا معلوم چورگھس گئے اور۳۴ہزار روپے نقدی اور کچھ تانبے کے برتن چوری کر کے لے گئے ۔
ترجمان نے کہا کہ اس شکایت پر کارروائی کرتے ہوئے پولیس اسٹیشن لال بازار میں ایک مقدمہ زیر نمبر۲۰۲۵/۷درج کرکے تحقیقات شروع کی ہے۔
بیان میں کہا گیا کہ سخت کوششوں اور شواہد کے تجزیے کے بعد پولیس ٹیم نے جرم کے ارتکاب کے چند گھنٹوں کے اندر اندر ہی ایک ملزم کو گرفتار کر لیا جس کی شناخت آصف مجید پرے ولد عبدالمجید پرے ساکن والٹینگو کنڈ کولگام کے طور پر ہوئی ہے ۔
پولیس ترجمان نے کہا کہ تفتیش کے دوران یہ بات سامنے آئی کہ ملزم نے ایک مقامی مسجد میں نصب سی سی ٹی وی کیمروں کا ڈی وی آر چوری کر لیا تھا تاکہ اس کی شناخت ظاہر نہ ہوسکے ۔
ترجمان نے کہا کہ ملزم کے انکشاف پر ۳۳ہزار۷سو۳۱روپیوں کی نقد رقم، مسجد رحمان جوگیوان لال بازار کے سی سی ٹی وی کیمرہ کا ڈی وی آر اور تانبے کے برتن بھی برآمد کئے گئے ۔ان کا کہنا ہے کہ اس ضمن میں مزید تحقیقات جاری ہے۔
بیان میں کہا گیا کہ جموں وکشمیر پولیس شہریوں کے تحفظ اور معاشرے سے جرائم کی بیخ کنی کو یقینی بنانے کیلئے پر عزم ہے ۔