اننت ناگ میں۲کروڑ روپے مالیت کا کمرشل کمپلیکس قرق:پولیس

سرینگر//
جموں وکشمیر پولیس نے جنوبی کشمیر کے ضلع اننت ناگ کے بجبہاڑہ قصبے میں۲کروڑ روپے سے زیادہ مالیت کے ایک کمرشل کمپلیکس کو منسلک کر دیا۔
ایک پولیس ترجمان نے اس کارروائی سے متعلق تفصیلات فراہم کرتے ہوئے اپنے ایک بیان میں کہا کہ منشیات سمگلروں کو ایک بڑا دھچکا دیتے ہوئے بجبہاڑہ پولیس اسٹیشن نے تلخان بجبہاڑہ سے تعلق رکھنے والے مرحوم عبد الرشید ڈار کے۲کروڑ روپے سے زیادہ مالیت کے ایک کمرشل کمپلیکس کو قرق کیا۔انہوں نے کہا کہ اس جائیداد کی نشاندہی منشیات کی غیر قانونی تجارت خاص طور پر نشہ آور ادویات اور سائیکو ٹراپک مواد کی اسمگلنگ کے ذریعے حاصل کرنے کے طور پر کی گئی ہے ۔
ترجمان نے کہا کہ منسلک شدہ جائیداد میں سمتھن بجبہاڑہ میں قومی شاہراہ پر تعمیر کی گئی ایک کمرشل بلڈنگ ہے جو۵کنال۱۲مرلہ اراضی پر محیط ہے ۔انہوں نے کہا کہ مذکورہ شخص پولیس اسٹیشن بجبہاڑہ میں این ڈی پی ایس ایکٹ کے درج ایک ایف آئی آر زیر نمبر۲۰۲۰/۲۱۰میں ملوث تھا۔ان کا کہنا تھا’’ستمبر۲۰۲۰میں متوفی عبدالرشید ڈار کے احاطے میں ایک زیر زمین کمرہ کا پتہ لگایا گیا تھا جس میں کافی مقدار میں ممنوعہ مواد غالباً فکی تھیلوں اور پلاسٹک بیرل میں پیک کیا گیا تھا‘‘۔
پولیس ترجمان نے بتایا کہ تحقیقات کے دوران معلوم ہوا کہ متوفی نے یہ ممنوعہ مواد غیر قانونی ذرائع سے حاصل کیا تھا اور اس کا غیر قانونی طور پر مقامی نوجوانوں کو فروخت کرنے کیلئے ذخیرہ کیا تھا اس طرح منشیات کی لت میں پڑنے والوں اور اس کے تجارت کو فروغ دیا تھا۔
تررجمان نے کہا کہ جائے موقع سے۲۶سو کلو وزنی۱۲۶تھیلے اور۱۳سو۹۶کلو وزنی۶۰پلاسٹک بیرل بر آمد کئے گئے تھے جن میں ممنوعہ مواد بھرا ہوا تھا۔ان کا کہنا ہے کہ اننت ناگ پولیس نے غیر قانونی طور پر حاصل شدہ پیسے سے تعمیر ہونے والے کمرشل کمپلیکس کو منسلک کرکے منشیات فروشی کے خلاف سخت کارروائی انجام دی ہے ۔