سابق ٹریڈ یونین لیڈر خورشید عالم پیپلز کانفرنس سے مستعفی

سرینگر//
سابق ٹریڈ یونین لیڈر خورشید عالم نے جمعہ کے روز جموں وکشمیر پیپلز کانفرنس سے استعفیٰ دے دیا۔
وہ پیپلز کانفرنس کے صوبائی صدر تھے اور انہوں نے مارچ۲۰۲۱میں اس پارٹی میں شمولیت اختیار کی تھی۔
عالم نے سماجی رابطہ گاہ ’ایکس‘پر ایک پوسٹ کرکے پارٹی سے مستعفی ہونے کا اعلان کیا۔
سابق ٹرید یونین لیڈرنے کہا’’اس معزز پارٹی کے ساتھ وابستہ رہنے سے نا قابل یقین تجربہ حاصل ہوا تاہم وقت اور حالات کا تقاضا ہے کہ میں اپنے عوام کے نمائندے کی حیثیت سے افق سے پرے دیکھوں اور ان کے تحفظات کو دور کر سکوں اور ان کے اعتماد کا حترام کروں جو شروع سے ہی انہوں نے مجھ پر ظاہر کیا ہے‘‘۔
عالم نے اپنے پوسٹ میں کہا’’گرچہ پیپلز کانفرنس ایک شاندار پلیٹ فارم ہے اور سجاد لون صاحب ایک قابل ذکر شخص ہیں جن کے ساتھ میرا برادرانہ رشتہ ہے ‘‘۔ان کا مزید کہنا تھا’’مجھے یقین ہے کہ میرے لوگوں کے مینڈیٹ کو یہاں پوری توجہ نہیں دی جائے گی اب وقت آگیا ہے کہ میں اپنے حلقے کی بہتر خدمت کیلئے آگے بڑھوں‘‘۔
قابل ذکر ہے کہ خورشید عالم نے سرکاری نوکری سے سبکدوش ہونے کے بعد پی ڈی پی میں شمولیت اختیار کی تھی۔
پانچ اگست۲۰۱۹کو دفعہ۳۷۰کی تنسیخ کے بعد ان کو بھی بند کیا گیا تھا۔انہوں نے مارچ۲۰۲۱میں پی ڈی پی سے استعفیٰ دیا تھا۔