دفعہ۳۷۰کی منسوخی کے بعد حالات معمول پر آئے ہیں :ریڈی

جموں//
مرکزی وزیر ‘جی کشن ریڈی کا کہنا ہے کہ جموں وکشمیر میں دفعہ۳۷۰کے خاتمے کے بعد مثبت ماحول ہے ۔
ریڈی نے کہا کہ ہم لوک سبھا انتخابات کے بعد جائزہ لے رہے ہیں اور ہم جموں وکشمیر میں بی جے پی کے آیندہ پروگراموں پر تبادلہ خیال کریں گے ۔
ان باتوں کا اظہار مرکزی وزیر نے جموں میں نامہ نگاروں سے بات چیت کے دوران کیا۔
ریڈی نے کہاکہ جموں وکشمیر کے ساتھ ساتھ ملک کی مختلف ریاستوں اور مرکزی زیر انتظام علاقوں میں اس وقت بھاجپا ورکنگ کمیٹی کی میٹنگیں ہو رہی ہیں۔
ان کے مطابق جموں میں بھی بی جے پی کے قومی صدر جے پی نڈا کی سربراہی میں میٹنگ منعقد ہوئی جس دوران پارٹی کو مزید مضبوط و مستحکم بنانے کی خاطر اہم فیصلے لئے گئے ۔
مرکزی وزیر نے کہا ’’دفعہ ۳۷۰کی منسوخی کے بعد جموں وکشمیر میں مثبت ماحول اور امن کا دور دورہ ہے‘‘ ۔
ریڈی کے مطابق موجودہ مرکزی حکومت نے جموںکشمیر کے حوالے سے بہت سارے کام کئے ہیں اور ہمیں یقین ہے کہ آنے والے وقت میں بی جے پی کو عوام کی بھر پور حمایت ملے گی۔
مرکزی وزیر کا مزید کہنا تھا کہ بی جے پی نے ہمیشہ جمہوریت کی حفاظت کی اور ہم اس پر چٹان کی طرح قائم ہیں ۔
جموںکشمیر میں اسمبلی الیکشن پر گفت وشنید کرنے کے بارے میں پوچھے گئے سوال کے جواب میں مرکزی وزیر نے کہاکہ ورکنگ کمیٹی میٹنگ میں اس پر بھی بات ہوگی۔انہوں نے کہاکہ پارٹی کو کیسے مضبوط کیا جائے ، انتخابات میں بھاجپا کی جیت کو کیسے یقینی بنایا جائے اس سب پر تبادلہ خیال ہو رہا ہے ۔
ریڈی کا مزید کہنا تھا کہ جموں وکشمیر کے لوگوں کیلئے بی جے پی نے کتنے کام کئے یہ سب کچھ عیاں ہے اوراس پر بات کرنے کی ضرورت نہیں ہے ۔