امر ناتھ یاترا :اب تک ایک لاکھ سٹھ ہزار یاتریوں نے درشن کئے

سرینگر///
امرناتھ گھپا میں ہفتہ کے روز ۷۵۰۰ سے زیادہ یاتریوں نے پوجا کی، جس کے بعد اب تک قدرتی طور پر بننے والے برفیلے لنگم کے درشن کرنے والے عقیدت مندوں کی تعداد بڑھ کر۵۹ء۱ لاکھ سے زیادہ ہو گئی ہے۔
امرناتھ یاترا کا آغاز۲۹ جون کو اننت ناگ میں روایتی ۴۸ کلومیٹر کے ننوان،پہلگام روٹ اور گاندربل میں ۱۴ کلومیٹر چھوٹا لیکن اونچا بالتل روٹ سے ہوا تھا۔
ایک عہدیدار نے بتایا کہ شدید بارش کے پیش نظر ہفتہ کی صبح یاترا کو عارضی طور پر روک دیا گیا تھا ، لیکن بعد میں دن میں دوبارہ شروع کردیا گیا۔
عہدیدار نے بتایا کہ ہفتہ کے روز ۷۵۵۲ یاتریوں نے یاترا کی اور سالانہ یاترا کے آٹھویں دن بابا بھولے ناتھ کے درشن کئے۔
اس سے پہلے بھاری بارشوں کے پیش انظر شری امرناتھ جی یاترا کو بنا بر احتیاط عارضی بنیادوں پر ہفتے کے روز دونوں راستوں سے معطل کر دیا گیا۔
ایک متعلقہ عہدیدار نے بتایا کہ وسطی کشمیر کے ضلع گاندربل میں واقع بالتل بیس کیمپ اور جنوبی کشمیر کے ضلع اننت ناگ میں واقع ننون پہلگام بیس کیمپ پر گذشتہ شام سے رک رک بھاری بارشیں ہو رہی ہیں جس کے پیش نظر ہفتے کی صبح یاترا کو دونوں راستوں سے معطل کر دیا گیا ہے ۔
عہدیدار نے کہا کہ یاترا کو عارضی طور پر معطل کرنے کا فیصلہ بنا بر احتیاط لیا گیا ہے تاکہ یاتریوں کے تحفظ کو یقینی بنایا جا سکے ۔ان کا کہنا تھا کہ ہفتے کو یاترا بحال ہونے کے بہت کم امکانات ہیں۔
بتادیں کہ یاترا کے پہلے ہفتے کے دوران قریب ڈیڑھ لاکھ یاتری کشمیر میں۳ہزار۸سو۸۰کلو میٹر بلندی پر واقع پوتر گھپا کے درشن سے فیضیاب ہوئے ہیں۔
دریں اثنا جموں کے بھگوتی نگر بیس کیمپ سے ہفتے کی صبح۵ہزار۸سو۷۶یاتریوں پر مشتمل ایک اور قافلہ ۲سو۴۵گاڑیوں میں سخت سیکورٹی بندبوست کے بیچ کشمیر کے لئے روانہ ہوا۔
سرکاری ذرائع نے بتایا کہ ان یاتریوں میں سے ۲ہزارایک سو۱۷یاتری جن میں ایک ہزار۵سو۳۷مرد،۴سو ۷۲خواتین‘۱۱بچے ‘۹۲سادھو اور۵سادھوئیں شامل تھیں، بالتل بیس کیمپ کیلئے جبکہ ۳ہزر۷سو ۵۹یاتری ننون پہلگام کے لئے روانہ ہوئے ۔
یاد رہے کہ جموں وکشمیر کے لیفٹیننٹ گورنر منوج سنہا نے۲۸جون کی صبح۴ہزار۶سو۳یاتریوں کے پہلے جتھے کو جموں کے بھگوتی نگر بیس کیمپ سے کشمیر کے لئے روانہ کیا تھا۔
وادی میں انتظامیہ، سول سوسائٹی تنظمیوں، تجارتی یونیوں اور عام لوگوں نے یاتریوں کا پرتپاک استقبال کیا۔یاترا کو تحفظ کو یقینی بنانے کیلئے تمام تر انتطامات کئے گئے ہیں۔جہاں یاتریوں کو تمام سہولیات و خدمات بہم پہنچانے کے لئے بہترین انتظامات کئے گئے ہیں وہیں سیکورٹی کا بھی فقید المثال بند وبست کیا گیا ہے ۔
پولیس ذرائع کے مطابق یاترا روٹوں پر قریب ۸۰۰سی سی ٹی وی کیمرے نصب کئے گئے ہیں۔
علاوہ ازیں سیکورٹی فورسز کی۵۰۰اضافی کمپنیاں تعینات کی گئیں ہیں۔ ہر کمپنی کم از کم ایک سو اہلکاروں پر مشتمل ہے ۔قابل ذکر ہے کہ ۵۲دنوں پر محیط یہ یاترا۱۹؍اگست کو رکشا بندھن کے موقع پر اختتام پذیر ہوگی۔