سرینگر میں ایک خاتون مسروقہ رقم سمیت گرفتارـ:پولیس

سرینگر//
پولیس کا کہنا کہ انہوں نے سرینگر میں ایک خاتون کو گرفتار کرکے اس کی تحویل سے لاکھوں روپیوں کی مسروقہ رقم بر آمد کی ہے ۔
پولیس نے کہا کہ اس سلسلے میں پولیس اسٹیشن صدر میں متعلقہ دفعات کے تحت ایک کیس درج کیا گیا ہے اور مزید تحقیقات شروع کی گئی ہے۔
پولیس کے ایک ترجمان نے بتایا کہ پرویز احمد وانی ولد مرحوم عبدالخالق وانی ساکن چنار کالونی باغات سرینگر نے تھانہ صدر میں تحریری طورپر شکایت درج کی کہ۲۵سے ۲۷مئی کو نامعلوم افراد ان کے گھر میں گھس کر وہاں چوری کو انجام دیا۔انہوں نے بتایا کہ پولیس نے معاملے کی نسبت کیس درج کرکے تحقیقات شروع کی ۔
ترجمان کے مطابق تحقیقات کے دوران ٹیکنیکی ثبوت و شواہد کو کھنگالا گیا جس دوران ایک خاتون جس کی شناخت نصرت نثار زوجہ نثار احمد کچے ساکن بارسو اونتی پورہ کے بطور ہوئی ہے کا نام سامنے آیا اور بعد ازاں اس کی گرفتاری عمل میں لائی گئی ۔
پولیس ترجمان نے کہا’’سرینگر پولیس نے ملزم نصرت نثار زوجہ نثار احمد کچھے ساکن بارسو اونتی پورہ کے رہائشی مکان سے۲۳لاکھ ۴۶ہزار روپیوں کی مسروقہ رقم بر آمد کی ہے ‘‘۔
ترجمان نے کہا کہ اس سلسلے میں تھانہ صدر میں آئی پی سی کے۳۸۰/۴۵۴کے تحت ایک ایف آئی آر زیر نمبر۲۰۲۴/۶۹درج کیا گیا ہے اور ملزمہ کو گرفتار کیا گیا ہے ۔
اس سلسلے میں مزید تحقیقات جاری ہے ۔