جموں وکشمیر میں۲۷مئی تک موسم خشک رہنے کا امکان

سرینگر//
محکمہ موسمیات نے جموں وکشمیر میں۲۷مئی تک موسم میں وسیع پیمانے پر کسی تبدیلی کو خارج از امکان قرار دیا ہے ۔
متعلقہ محکمے کے ایک ترجمان نے بتایا کہ جموں وکشمیر میں۲۷مئی تک موسم میں کسی بڑی پیمانے کی تبدیلی کا کوئی امکان نہیں ہے ۔انہوں نے کہا کہ تاہم اس دوران جموں کے میدانی علاقوں میں موسم خشک رہنے کے ساتھ گرم رہ سکتا ہے ۔
ان کا کہنا تھا کہ وادی میں۱۸؍اور۱۹مئی کو موسم اجزوی طور پر ابر آلود رہنے کے ساتھ کہیں کہیں گرج چمک کے ساتھ ہلکی بارشوں کا امکان ہے ۔
موسمیات محکمہ کے ترجمان نے بتایا کہ۲۰سے۲۷ تک موسم مجموعی طور پر خشک رہنے کا امکان ہے ۔محکمے نے کسانوں سے کہا کہ وہ۲۰مئی سے اپنے کھیت کھلیانوں اور باغوں میں اپنے آپریشنز شروع کر سکتے ہیں۔
دریں اثنا وادی میں بیشتر مقامات پر شبانہ درجہ حرارت معمول سے۲سے۳ڈگری سینٹی گریڈ زیادہ ریکارڈ ہوا ہے ۔
گرمائی دار الحکومت سرینگر میں کم سے کم درجہ حرارت۵ء۱۴ڈگری سینٹی گریڈ ریکارڈ کیا گیا جبکہ وادی کے مشہور سیاحتی مقامات گلمرگ اور پہلگام میں کم سے کم درجہ حرارت بالترتیب۰ء۱۱ڈگری سینٹی گریڈ اور۵ء۷ڈگری سینٹی گریڈ ریکارڈ ہوا تھا۔