امرناتھ یاتراـیاتریوں کو پودے بطورپرسادفروخت کئے جائیں گے

سرینگر//
امرناتھ شرائن بورڈ کی طرف سے امسال گھپا کے یاتریوں کو بورڈ کی نرسری میں اگائے جانے والے پودے بطور ’پرساد‘فروخت کئے جائیں گے ۔
بورڈ ذرائع نے بتایا کہ شرائن بورڈ نے امسال فیصلہ لیا ہے کہ نہاری کاہ بھون میں ایک دکان کھول دی جائے گی جہاں پودوں کو دستیاب رکھا جائے گا جن کو یاتریوں کو بطور پرسادفروخت کیا جائے گا۔
ذرائع نے کہا کہ یہ پودے شرائن بورڈ کی طرف سے چلائی جا رہی ایک نرسری میں اگائے جاتے ہیں۔
ان کا کہنا تھا کہ پہلے یہ پودے نرسری کے گرد و پیش دیہات کے لوگوں کو رعایتی داموں میں فرخت کئے جاتے تھے ۔
بتادیں کہ کشمیر میں امسال شری امر ناتھ جی یاترا ۲۹جون سے شروع ہوگی اور۵۲دنوں پر محیط یہ یاترا۱۹؍اگست کو اختتام پذیر ہوگی۔
دریں اثنا اس یاترا کیلئے رجسٹریشن کا عمل جاری ہے اور ذرائع کے مطابق گذشتہ ایک ماہ میں قریب تین لاکھ عقیدت مندوں نے ایڈوانس رجسٹریشن کرائی ہے ۔
امرناتھ گھپا جنوبی کشمیر کے ہمالیہ پہاڑیوں پر سطح سمندر سے ۳ہزار۸سو۸۰میٹر کی بلندی پر واقع ہے اور گھپا تک پہنچنے کے لئے جنوبی کشمیر کے ضلع اننت ناگ میں روایتی ۴۸کلو میٹر طویل ننوان پہلگام راستہ اور وسطی کشمیر کے ضلع گاندربل میں۱۴کلو میٹر طویل بالتل راستہ ہے ۔
سرکاری اعداد و شمار کے مطابق سال گذشتہ قریب ساڑھے چار لاکھ یاتریوں نے پوتر گھپا کا درشن کیا تھا۔