سری نگر میونسپل حدود کے اندر آنے والے سکولوں کے اوقات کار تبدیل

سرینگر/۲مئی
ڈائریکٹوریٹ آف سکول ایجوکیشن کشمیر (ڈی ایس ای کے ) نے سری نگر میونسپل حدود کے اندر آنے والے سکولوں کے اوقات کار میں تبدیلی کا حکم دیا ہے ۔
حکام کے مطابق 6 مئی سے یہ سکول صبح ساڑھے 8 بجے سے دوپہر ڈھائی بجے تک کھلے رہیں گے ۔
ڈی ایس ای کے کی طرف سے جمعرات کو جاری ایک حکم نامے میں کہا گیا”مجاز اتھارٹی سے دی گئی اجازت کے بعد سری نگر میونسپل حدود کے اندر آنے والے تمام سرکاری و پرائیویٹ اسکول صبح ساڑھے 8 بجے سے دوپہر ڈھائی بجے تک کھلے رہیں گے “۔
قبل ازیں متعلقہ محکمے نے 8 اپریل کو سکولوں کے اوقات کار کے متعلق ایک حکمنامہ جاری کیا تھا۔
متعلقہ محکمے کے اس حکمنامے میں کہا گیا تھا کہ 12 اپریل سے سری نگر میونسپل حدود کے اندر آنے والے تمام سرکاری و غیر سرکاری اسکولوں میں نئے اوقات کار صبح 9 بجے سے دوپہر 3 بجے تک جبکہ سری نگر میونسپل حدود سے باہر آنے والے اور دوسرے اضلاع کے سکولوں میں نئے اوقات کار صبح 10 بجے سے شام چار بجے تک ہوں گے ۔