بارشیں:منگل کو کشمیر کے تمام اسکول بند رہیں گے

سرینگر/۲۹اپریل
کشمیر میں مسلسل بارش کے پیش نظر ڈویڑنل انتظامیہ نے احتیاطی تدابیر کے طور پر منگل کو یہاں اسکول بند رکھنے کا فیصلہ کیا ہے۔
تاہم انتظامیہ نے کہا کہ گھبرانے کی کوئی ضرورت نہیں ہے اور یہ فیصلہ احتیاطی اقدام کے طور پر لیا گیا ہے۔
کشمیر کے ڈویڑنل کمشنر ‘وجے کمار بدھوری نے کہا”فیلڈ کی جانچ پڑتال کے بعد اور احتیاطی تدابیر کے طور پر، ہم نے یہاں اسکولوں کو بند رکھنے کا فیصلہ کیا ہے“۔
بدھوری نے کہا”ہم صورتحال پر نظر رکھے ہوئے ہیں اور فیلڈ افسر ہمیں مسلسل اپ ڈیٹ کر رہے ہیں“۔
اس دوران مسلسل بارش اور پانی بھرجانے کے پیش نظر وادی میں پیر کو کئی علاقوں میں اسکول بند رہے اور درس و تدریس کا عمل معطل رہا۔
طلباءکی حفاظت کے لئے احتیاطی اقدام کے طور پرپیر کو کپواڑہ ضلع کے تمام اسکولوں میں کلاس کا کام معطل کردیا گیا ۔ تاہم، تدریسی / غیر تدریسی عملہ صورتحال کی نگرانی اور اپنے متعلقہ اداروں کے ادارہ جاتی اثاثوں کی حفاظت کو یقینی بنانے کے لئے اپنے فرائض انجام دےتا رہا۔
اس کے علاوہ دوڈہ ‘رام بن‘بانڈی پورہ اور گریز میں بھی آج درس و تدریس کا عمل معطل رہا ۔
سب ڈویڑن کنگن کے دائرہ اختیار میں آنے والے ہائر سیکنڈری سطح تک کے تمام تعلیمی اداروں میں طلباءکی حفاظت اور فلاح و بہبود کےلئے پیرکو کلاس ورک معطل رہا۔