لگتا ہے کہ قدرت اور کے پی ڈی سی ایل(محکمہ بجلی) نے ہاتھ لایا ہے… انتخابات کے اس موسم میں ان دونوں نے گٹھ جوڑ کیا ہے… نہیں صاحب ووٹ حاصل کرنے کیلئے نہیں بلکہ ہم… ہم کشمیریوں کو بہار… موسم بہار میں سرما کا احساس دلانے کیلئے اتحاد کیا ہے… اور اگرواقعی میں ان کا یہی ارادی تھا‘ منصوبہ تھا یا پھر سازش تھی تو… تو کوئی انہیں جاکے کہہ دے کہ یہ دونوں اپنے اس منصوبے میں کامیاب نہیں بلکہ بہت زیادہ کامیاب ہو ئے ہیں … یقینا اس وقت کشمیر میں… موسم بہار میں موسم سرما کا احساس ہو رہا ہے اور… اور خوب ہو رہا ہے ۔ اگر آسمان سے جل برس رہا ہے اور اب متواتر کئی دنوں اور ہفتوں سے برس رہا ہے تو… تو کے پی ڈی سی ایل نے کشمیر کو تاریکیوں میں ڈبو کر موسم سرما کے سامان پیدا کئے ہیں… یا پھر اس سے بھی ایک قدم آگے کہ… کہ… موسم سرما میں سمارٹ میٹر والے علاقوں میں ۲۴ گھنٹوں میں اوسطاً بجلی تین مرحلوں میں ڈیرھ ڈیڑھ گھنٹے کیلئے بند رہتی تھی… یعنی ۲۴ گھنٹوں میں ساڈھے انیس گھنٹے بجلی دستیاب رہتی تھی… اس کے علاوہ شیڈول بھی دستیاب رہتا تھا…یعنی لوگوں کو خبر ہو تی کہ بجلی آئیگی کب اور جائیگی کب… لیکن صاحب اس وقت ایسا کوئی شیڈول دستیاب نہیں ہے… اسی طرح جس طرح بجلی دستیاب نہیں ہے کہ… کہ ۲۴ گھنٹوں میں بارہ گھنٹے بھی بجلی فراہم نہیں کی جا رہی ہے… ہم بات سمارٹ میٹر والے علاقوں کی کررہے ہیں… باقی علاقوں کا تو خدا ہی حافظ ہے ۔اس وقت بھی جب ہم اس کالم کو ضبط تحریر میں لا رہے ہیں آسمان پر کالے گھنے بادل چھائے ہوئے ہیں… اور جل تھل جاری ہے جبکہ بجلی بھی اپنے گھر … بجلی گھر سدھائی گئی ہے … بجلی نہیں ہے ۔بات اگر صرف بارشوں کی ہوتی تو… تو تب بھی بات سمجھ میں آجاتی ‘ لیکن… لیکن بارشوں کے ساتھ جو ٹھنڈ ہے… جو سردی ہے… اللہ میاں کی قسم یہ سردی بھی ہمیں بہار میں جاڑے کا ہی احساس دلا رہی ہے اور… اور بڑی شدت سے دلا رہی ہے …کب تک یہ تو ہمیں معلوم نہیں … سوائے اس ایک بات کے کہ… کہ کے پی ڈی سی ایل ایسی ایک بھی کوشش نہیں کررہا ہے… اور بالکل بھی نہیں کررہا ہے کہ وادی میں اس وقت جو بجلی بحران اب کئی دنوں سے جاری ہے… اس بحران پر قابو پا لیا جائے کہ… کہ حکومت کی طرف سے ایسی کسی ضرورت کا مظاہرہ نہیں کیا جارہا ہے اور… اور اس لئے نہیں کیا جارہا ہے کہ کے پی ڈی سی ایل نے قدرت کے ساتھ معاہدہ جو کیا ہے… بہا ر میں سرما کا احساس دلانے کا معاہدہ۔ ہے نا؟