آغا روح اللہ نے سرینگر لوک سبھا سیٹ کیلئے کاغذات نامزدگی جمع کئے

سرینگر//
نیشنل کانفرنس کے سینئر لیڈر اور با اثر شیعہ لیڈر آغا سید روح اللہ نے جمعرات کو یہاں سری نگر لوک سبھا سیٹ کے لئے کاغذات نامزدگی جمع کئے ۔
روح اللہ مین قصبہ بڈگام میں واقع اپنی رہائش گاہ سے ایک بڑی ریلی کی صورت میں جمعرات کی صبح سری نگر پہنچے اور ہاں ضلع مجسٹریٹ کے دفتر میں کاغذات نامزدگی جمع کئے ۔
اس دوران پارٹی کے صدر ڈاکٹر فاروق عبداللہ، نائب صدر عمر عبداللہ، جموں و کشمیر پردیش کانگریس پارٹی کے صدر وقار رسول وانی ان کے ہمراہ تھے ۔
روح اللہ نے اس موقع پر نامہ نگاروں کے ساتھ بات کرتے ہوئے کہا’’اس الیکشن سے ہم ملک کے بڑے ایوان کے ذریعے لوگوں کو یہ بتا سکیں گے کہ سال ۲۰۱۹میں لئے گئے فیصلوں کو جموں وکشمیر کے لوگوں نے قبول نہیں کیا ہے ۔ان کا کہنا تھا کہ دفعہ ۳۷۰ہم سے چھینا گیا ہم جمہوری طریقے سے لوگوں تک اپنی آواز پہنچائیں گے ‘‘۔
پارٹی صدر ڈاکٹر فاروق عبداللہ نے اس موقع پر بتایا’’ایک طرف ہم ہیں اور دوسری طرف ہمارے سارے دشمن ہمارے خلاف لڑ رہے ہیں‘لیکن اللہ ہم کو ہی کامیابی سے ہمکنار کرے گا‘‘۔
نیشنل کانفرنس کے نائب صدر عمر عبداللہ نے میڈیا کو بتایا’’بی جے پی نے پی ڈی پی پی کو بھی سپورٹ کرنے کا اعلان کیا ہے ، نیشنل کانفرنس، بی جے پی اس کی تمام اے ، بی، سی ٹیموں اور مرکزی حکومت کے خلاف الیکشن لڑ رہی ہے ‘‘۔انہوں نے کہا’’ہماری شمع کو بجھانے کی کوشش کی جا رہی ہے لیکن ہمیں اللہ تعالیٰ اور لوگوں کی حمایت حاصل ہے لہذا یہ لوگ ہمارا کچھ بھی نہیں بگاڑ سکتے ہیں‘‘۔
کانگریس پارٹی کے صدر وقار رسول نے میڈیا کو بتایا’’انڈیا الائنس ان طاقتوں کو ہرانے کے لئے تیار ہے جنہوں نے جموں وکشمیر کو تباہ کیا اور جموں وکشمیر کے خصوصی درجے کو ہٹایا‘‘۔انہوں نے مزید کہا’’ہماری پارٹی پوری طاقت سے نیشنل کانفرنس کو کامیاب کرنے کی کوشش کرے گی۔‘‘