لوک سبھا میں اکثریت کو دفعہ۳۷۰ کی منسوخی کیلئے استعمال کیا :امیت شاہ

کوٹا//
مرکزی وزیر داخلہ امیت شاہ نے ہفتہ کو کہا کہ عوام نے ۲۰۱۴؍ اور۲۰۱۹ کے انتخابات میں بی جے پی کو مکمل اکثریت دی اور اس نے اس کا استعمال آرٹیکل ۳۷۰ کو ختم کرنے ، رام مندر کی تعمیر ، سی اے اے کو نافذ کرنے اور لوک سبھا اور ریاستی اسمبلیوں میں خواتین کو ۳۳ فیصد ریزرویشن دینے کے لئے کیا۔
امیت شاہ نے آج یہاں وجے سنکلپ مہا سمیلن سے خطاب کرتے ہوئے کہا کہ آپ نے ہمیں ۲۰۱۴ اور۲۰۱۹میں مکمل اکثریت دی تھی، ہم نے ۳۷۰کو ختم کرنے، شری رام جنم بھومی پر مندر بنانے، سی اے اے نافذ کرنے اور لوک سبھا اور اسمبلیوں میں خواتین کو۳۳د ریزرویشن دینے کے لئے اکثریت کا استعمال کیا۔
وزیر داخلہ نے کہا کہ اگر آپ نے ۲۰۱۹میں کانگریس کو ووٹ دیا ہوتا تو کوٹا پی ایف آئی کا گھر بن جاتا۔ آپ نے وزیر اعظم مودی کو ووٹ دیا اور انہوں نے پی ایف آئی کو ختم کرکے انہیں سلاخوں کے پیچھے ڈال دیا۔کانگرئس کا کہنا ہے کہ وہ پی ایف آئی پر عائد پابندی اٹھا لیں گے۔ کانگریس ترقی مخالف پارٹی ہے۔ پانچ سال تک گہلوت کی حکومت رہی لیکن انہوں نے مشرقی راجستھان کینال پروجیکٹ کو پانچ سال تک آگے نہیں بڑھنے دیا۔ بھجن لال شرما حکومت کے اقتدار میں آنے کے بعد تین ماہ کے اندر ہم نے مشرقی راجستھان کینال پروجیکٹ کے معاہدے پر دستخط کیے۔
اس سے پہلے ایک روڈ شو کے دوران شاہ کانگریس لیڈر راہول گاندھی پر طنز کرنے سے باز نہیں آ سکے اور انہوں نے کشمیر میں بدامنی کے بارے میں ان کی ماضی کی پیشگوئیوں کا مذاق اڑایا۔
مرکزی وزیر داخلہ نے کہا کہ کشمیر میں پیپلز ڈیموکریٹک پارٹی (پی ڈی پی) کی سربراہ محبوبہ مفتی اور راہول بابا (گاندھی) کہا کرتے تھے کہ آرٹیکل ۳۷۰ہٹائے جانے کے بعد یہاں خونریزی ہوگی۔
شاہ نے کہا’’راہول بابا، آرٹیکل۳۷۰کی منسوخی کے بعد پانچ سال گزر چکے ہیں۔ یہ وزیر اعظم نریندر مودی کی حکومت ہے۔ خون ریزی کی بات تو دور کی بات ہے، کسی میں بھی وہاں پتھر پھینکنے کی ہمت نہیں ہے۔‘‘