’این سی نے جموں وکشمیر کو تباہی کے دہانے پر پہنچا دیا‘

جموں//
ڈیموکریٹک پروگریسیو آزاد پارٹی(ڈی پی اے پی) کے سربراہ غلام نبی آزاد نے ہفتے کے روز کہاکہ نیشنل کانفرنس بھارتیہ جنتا پارٹی(بی جے پی) کی اے ٹیم ہے ۔
آزاد نے کہاکہ جموںکشمیر کی تباہی و بربادی کی ذمہ دار نیشنل کانفرنس ہے ۔
آزاد نے ان باتوں کا اظہار ڈوڈہ میں روڈ شو کے دوران کیا۔
سابق وزیر اعلیٰ نے کہاکہ نیشنل کانفرنس ہمیں بی جے پی کی ایک ٹیم کہہ رہی ہے لیکن اصل میں این سی ،بی جے پی کی اے ٹیم ہے کیونکہ عمر عبداللہ بی جے پی کی قیادت والی مرکزی سرکار میں وزیر رہ چکے ہیں۔
آزاد کے مطابق نیشنل کانفرنس اور بی جے پی کے درمیان قریبی روابط ہے اور این سی سرپرست اعلیٰ غلام نبی آزاد پر الزامات عائد کررہا ہے لیکن بی جے پی کے خلاف وہ کچھ بھی نہیں بول پا رہے ہیں۔
ڈی پی اے پی کے سربراہ نے مزید بتایا کہ فاروق عبداللہ بی جے پی کے گیت گا رہے ہیں ۔ آزاد نے کہاکہ نیشنل کانفرنس کے لیڈروں نے کشمیر سے لے کر پوری دنیا میں بڑے بڑے محلات بنائے ہیں ۔
آزاد نے کہا’’میں لوگوں کے مسائل حل کرنے کی خاطر ریاستی سیاست میں آکر ملکی سیاست کو خیر باد کہہ دیا۔
سابق وزیر اعلیٰ نے کہاکہ آنے والے لوک سبھا انتخابات میں جموں کشمیر کے عوام کو پروگریسو آزاد پارٹی کے امیدواروں کے حق میں اپنی رائے دہی کا استعمال کرنا چاہئے ۔انہوں نے مزید بتایا کہ بطور وزیرا علیٰ جموں وکشمیر کے سبھی خطوں کو برابری کی بنیاد پر انصاف فراہم کیا۔
ڈی پی اے پی سربراہ کا مزید کہنا تھا کہ پارلیمنٹ میں جموں کشمیر کے لوگوں کے مسائل اجاگر کرنے کی خاطر لوگوں کو سوچ سمجھ کر اپنے ووٹ کا استعمال کر نا چاہئے ۔